Hatimogulları û Bakirhan peyama Cejna Qurbanê belav kirin

PeyamaKurd - Hevserokên DEM Partiyê Tulay Hatimogulları û Tuncer Bakirhan, di peyama xwe ya Cejna Qurbanê de bal kişandin ser pêvajoya berdewam a di derbarê çareserkirina pirsgirêka Kurd de. Wan herwiha diyar kirin, "Encama herî baş ji bo Tirkiye û Rojhilata Navîn pêkanîna demokrasiyeke xurt û aştiyeke bi rûmet e."

Hevserokên Partiya Wekhevî û Demokrasiyê ya Gelan (DEM Partiyê) Tulay Hatimogulları û Tuncer Bakirhan peyamek ji bo Cejna Qurbanê weşandin.

Di peyama xwe de ku bi Kurdî, Tirkî û Erebî hatiye weşandin, Hatimogulları û Tuncer Bakirhan bal kişandin ser pêvajoya berdewam a di derbarê çareseriya pirsgirêka Kurd de û tekezî li ser demokrasî û aştiyeke bi rûmet kirin.

Peyamên hevserokan wiha ne:

"Em hêvî dikin ku Cejna Qurbanê deriyên serdemekê veke ku tê de jiyana demokratîk ku em herî zêde hewcedarê wê ne, xurt bibe, serweriya hiqûqê were parastin, azadî serdest bibe û nan bi awayekî dadperwer û wekhev were belavkirin. Di van rojên dîrokî yên Pêvajoya Aştî û Civaka Demokratîk de, tiştê herî baş ji bo Tirkiye û Rojhilata Navîn pêkanîna demokrasiyeke xurt û aştiyeke bi rûmet e. Divê aştiya civakî bi edalet û mafan were bidestxistin.

Bi hêviya gihîştina demekê ku hemû astengiyên li pêşiya siyaseta demokratîk werin rakirin û pêşerojeke azad û aştiyane li ser bingeha hemwelatîbûna wekhev were avakirin, em ê têkoşîna xwe bidomînin da ku rêziknameyek ava bikin ku tê de gel wê bi wekhevî û bi biratî di pêşerojeke hevpar û di civakeke demokratîk de bijîn. Em Cejna Qurbanê li hemû gelê xwe pîroz dikin û em hêvî dikin ku ew ê bibe cejnek ku rê li ber jiyaneke nû veke ku tê de edalet, wekhevî, demokrasî û azadî serdest bibin."