Li Hesekê zarokek di çemê Xabûrê de xeniqî

PeyamaKurd - Li herêma Nişwe ya bajarê Hesekê ya Rojavayê Kurdistanê du zarokên 14 salî yên ku ji bo avjeniyê ketibûn ava çemê Xabûrê, di nava avê de winda bûn.

Piştî ku her du zarok noqî avê bûn xelkê li derdorê tavilê dest bi hewildanên rizgarkirinê kir û di encama van hewildanan de, yek ji zarokan ji aliyê welatiyan ve hat rizgarkirin.

Zarokê hatî rizgarkirin ji bo dermankirinê hat veguhastin, lê ji bo zarokê din xebatên lêgerînê hatin destpêkirin.

Tîmên Parastina Sivîl ên ku piştî agahdarkirinê çûn cihê bûyerê, li seranserê çemê Xabûrê dest bi operasyoneke berfireh a lêgerînê kirin. Tevî ku tîman diyar kirin ku ji ber dema derbasbûyî îhtîmaleke mezin e zarokê din jiyana xwe ji dest dabe, wan tekez kir ku xebatên wan heta dîtina zarokî dê bi hemû hêza xwe berdewam bikin.