Li Kurdistanê çanda pêkvejiyanê xurt e: Kakeyî û Misilman cejna hev pîroz dikin

PeyamaKurd - Li bajarê Helebce yê Başûrê Kurdistanê, kurdên misilman û kakeyî cejna Remezanê li hev pîroz kirin.

Wekî gelek deverên Kurdistanê, li bajarê Helebce yê Başûrê Kurdistanê jî çandeke bedew ya pêkvejiyana ayînî heye ku îro di roja yekem a Cejna Remezanê de kurdên kakeyî çûn mala kurdên misilman û pîrozbahî li wan kirin.

Li gor nûçeya BasNewsê kurdekî kakeyî bi navê Asî Fayîq li ser pîrozkirina cejnê got, “Em çûn malên birayên xwe yên misilman û me cejna Remezanê li wan pîroz kir. Me xwest em mînakeke baş ya pêkvejiyanê nîşanî her kesî bidin.”

Esfendiyar Mihemed jî kesekî misilman e û got, “Bi rastî em gelekî şa bûn dema me dît birayên me yên kakeyî hatin cejna Remezanê li me pîroz kirin. Em gelekî ji hev hez dikin.”