Mesrûr Barzanî: Em şanaziyê bi serkeftina Namo Fazil a dîrokî dikin

Serokê Hikûmeta Herêma Kurdistanê Mesrûr Barzanî, pêşwaziya qehremanê navdar ê Kurd ê hunerên şer ên têkel (MMA) Namo Fazil kir û keyfxwesiya xwe bi dîtina wî anî ziman.

Mesrûr Barzanî li ser hesabê xwe yê medya civakî got ku ew mîna gelê Kurdistanê şanaziyê bi vê destkeftiya navneteweyî dikin û wekî hikûmet dê li ser handan, piştgirîkirin û pêşvebirina şiyana wî ya werzişî berdewam bin.

Ev pêşwazîkirin rastevast piştî vegera Fazil a ji Dewletên Yekbûyî yên Amerîkayê (DYA) pêk hat, ku li wir karibû dengê werzişa Kurdistanê bigihîne qonaxeke nû ya cîhanî.

Serkeftina dîrokî ya li Amerîkayê

Şervanê Kurd Namo Fazil, roja Yekşemê 17ê Gulana 2026an, di şeva werzişî ya binavê "Anakonda" de ku li hola navdar a "Intuit Dome" ya li bajarê Los Angelesê birêve çû, serkeftineke herî mezin tomar kir.

Fazil di vê hevrikiya girîng de ku bi awayekî zindî di ser torê cîhanî ya Netflixê re hat weşandin, rûbirûyî rikberê xwe yê Amerîkî Jake Babian bû; piştî berxwedana stratejîk a raunda yekem, di saniyeya 58an a raunda duyem de bi teknîka naskirî ya "Anaconda Choke" hevrikê xwe neçarî teslîmbûnê kir û alaya Kurdistanê li nav rîngê pêşçav kir.

Namo Fazil bi vê serkeftinê re rekora xwe gihand 10 serkeftin û tenê 1 şikestinê, bi vî rengî pêngaveke pir mezin ber bi platforma herî bi nav û deng a cîhanê, anku UFC (Ultimate Fighting Championship) ve avêt.