Xameneyî: Me Amerîka û Îsraîl têk bir, hay ji nakokiyên navxweyî hebin

PeyamaKurd – Rêberê Bilind ê Îranê Elî Xameneyî, di daxuyaniyeke televîzyonî de bang li gelê Îranê kir ku li dijî dijminan yekgirtî bin û xwe ji dubendî û nakokiyên navxweyî biparêzin. Xameneyî îdîa kir ku Amerîka û Îsraîl di "şerê 12 rojî" yê meha Hezîranê de têk çûne.

Xameneyî ku ev cara sêyemîn e ji destpêka şer ve derdikeve pêşberî kamerayan, di axaftina xwe de gotinên tund bikar anîn. Wî diyar kir ku Amerîka û Îsraîl nekarîne bigihîjin armancên xwe û got:

"Ew hatin ku sûc bikin, derb xwarin û destvala vegeriyan. Ev wateya rastîn a têkçûnê ye."

Gefên Îsraîlê û nîqaşa cîgiriyê 

Derketina Xameneyî ya li pêşberî raya giştî bal kişand, ji ber ku di demên dawî de xuyabûna wî kêm bûbû. Li gorî raporan, sedema vê yekê gefên rayedarên Îsraîlî ne ku dibêjin dibe ku ew Xameneyî bikin hedefa xwe.

Her wiha, di medyaya Îranê de nîqaş û spekulasyonên li ser destnîşankirina cîgirê Xameneyî jî zêde bûne. Lêbelê, Xameneyî di vê axaftinê de hewl da ku moral bide gel û got: "Gelê Îranê li dijî Amerîkayê bêtir yekgirtî bûye û di têkbirina dijmin de bi ser ketiye."