Muslim: Em dikarin bibêjin ku Tirkiyeyê Peymana 10ê Adarê qebûl kiriye

PeyamaKurd - Endamê Konseya Hevserokatiyê ya Partiya Yekîtiya Demokratîk (PYD) Salih Muslim diyar kir ku Tirkiye di civîna Serokê Amerîkayê Donald Trump û Serokê Sûriyeyê Ehmed Şera de cih girtiye û got, "Em niha dikarin bibêjin ku Tirkiyeyê Peymana 10ê Adarê qebûl kiriye. Ev peyman wê gelek pirsgirêkan, tevî pirsgirêka Kurd jî, çareser bike."

Salih Muslim ji medyaya Kurdî re li ser civîna Serokê Amerîkayê û Şera û helwesta Tirkiyeyê ya li ser vê pêvajoyê axivî.

Muslim civînê wekî "gaveke nû û erênî" ya ber bi çareserkirina krîza Sûriyeyê ve bi nav kir û bal kişand ser hebûna girîng a Wezîrê Derve yê Tirkiyeyê Hakan Fîdan.

Salih Muslim diyar kir ku civîn, ku demek dirêj di amadekariyê de bû, ji ber şert û mercan di demek guncaw de hat. Wî got, "Biryarek hevbeş li dijî terorê hat dayîn. Şera jî ji bo vê armancê çû Amerîkayê. Di civînê de gelek mijar hatin nîqaşkirin û li ser gelek mijaran lihevkirin hatin kirin."

Muslim diyar kir ku aliyê herî girîng ê civînê beşdariya Tirkiyeyê bû û wiha domand:

"Xala herî balkêş hebûna Wezîrê Derve yê Tirkiyeyê bû. Ew jî beşdarî civînê bû. Di vê civînê de rolên Tirkiye, Şera, DYA, hikûmeta Sûriyeyê û hêzên koalîsyonê hatin nîqaşkirin. Li ser gelek mijaran muhtemelen lihevkirinek çêbû. Wekî YPG, em vê civînê wekî gaveke erênî ji bo Rojhilata Navîn dibînin."

"Rakirina cezayan ji bo me jî erênî ye"

Muslim diyar kir ku wan rakirina cezayan ji aliyê DYA ve li ser Sûriyeyê pêşwazî kir.

Salih Muslim got, "Rakirina cezayan li ser Şera û hevkarên wî ji bo wê yekê bû ku ew bikaribin bi awayekî azadtir bixebitin. Lêbelê, divê cezayên bazirganiyê jî werin rakirin, ji ber ku yên herî zêde ji vê yekê bandor dibin gelê Sûriyeyê ne. Rakirina cezayan wê ji bo me jî encamên erênî hebin. Ev ê bihêle ku Meclîsa Demokratîk a Sûriyeyê (MSD) bi awayekî azadtir bixebite. Ew ê bandorek erênî li ser pêşveçûna projeyê jî bike."

"Rewşa Rojava wê li Şamê zelal bibe"

Salih Muslim got ku beşdarbûna Wezîrê Derve yê Tirkiyê Hakan Fîdan di civînê de nîşanek e ku nîqaşên li ser statuya Rojava diqewimin.

Muslim destnîşan kir ku hûrguliyên mijarê hîn nehatine eşkerekirin û got ku piştî vegera xwe ya Sûriyeyê, Şara wê bi Hêzên Demokratîk ên Sûriyeyê (HSD) re bicive.

Muslim diyar kir ku ew li bendê ye ku di hefteyên pêş de li Şamê civînek berfireh hebe, ku wê nûnerên DYA û Koalîsyonê jî tê de beşdar bibin û got, "Tirkiye, DYA û El Şara rewşa Bakur û Rojhilatê Sûriyeyê nîqaş kirin û gihîştin rêkeftinekê. Ev mijar dê di hefteyên pêş de li Şamê zelal bibe."

"Meseleya Kurd jî wê bi Peymana 10ê Adarê çareser bibe"

Muslim tekez kir ku Peymana 10ê Adarê ne tenê ji bo Rojava, lê ji bo tevahiya Sûriyeyê girîng e û got:

"Heşt madeyên di vê peymanê de ji bo berjewendiya her kesî ne. Lêbelê, heta niha kesên ku li dijî vê peymanê derketin hebûn. Tirkiye, ji ber ku beşdarî pêvajoya amadekariyê nebû, dixwest ku ew were betalkirin. Lêbelê, ji ber ku Wezîrê Derve yê Tirkiyeyê jî di civîna heyî de amade ye, em dikarin niha bibêjin ku Tirkiyeyê ev peyman qebûl kiriye. Danûstandin qediyane, û bi pêkanîna Peymana 10ê Adarê, gelek pirsgirêk, di nav de meseleya Kurd jî, dê werin çareser kirin."