Sine: Rejîma Îranê bi hinceta ku endama "Komelaya Rojhilat" e, 3 sal cezayê zindanê li jineke Kurd birî

PeyamaKurd – Dezgeha Dadwerî ya Komara Îslamî ya Îranê, bi tohmeta endamtiya partiyeke Kurdî, 3 sal cezayê girtîgehê li jina Kurd Şeyda Ezîzî birî. Ezîzî di dema aloziyên di navbera rejîma Îran û Îsraîlê de hatibû girtin.

Li gorî rapora Rêxistina Mafên Mirovan a Hengawê, Şeyda Ezîziya ji bajarê Kamêranê ya Rojhilatê Kurdistanê, ji aliyê Şaxê 1emîn ê Dadgeha Şoreşê ya Sineyê ve hatiye darizandin. Dadgehê bi îdiaya "endamtiya di Partiya Komele ya Kurdistana Îranê de" û "hewldana li dijî ewlehiya neteweyî", 3 sal cezayê zindanê lê birrî.

Şeyda Ezîziya ku ev 6 meh in girtî ye, di dema şerê 12 rojan ê di navbera rejîma Îran û Îsraîlê de li bajarê Kamêranê yê Rojhilatê Kurdistanê hatibû binçavkirin. Hat diyarkirin ku piştî lêpirsînê, ew veguhastin Girtîgeha Navendî ya Sineyê (Navenda Çaksazî û Perwerdeyê).

Hate ragihandin ku di vê pêvajoyê de mafên bingehîn ên Ezîzî hatine binpêkirin; rê nehatiye dayîn ku ew bi parêzerê xwe re rûnê û pêwendiyê bi malbata xwe re dayîne.