وتاری سەرۆک بارزانی لە سیمپۆزیۆمی مەلای جزیری لە شرناخ

لە میانی بەشداریکردنی لە چوارەمین دیداری نێودەوڵەتیی مەلای جزیری، کە لە شرناخی باکووری کوردستان بەڕێوەچوو، سەرۆک مەسعود بارزانی سوپاسی جەماوەری کرد بۆ ئەو پێشوازییە گەرمە و گوتی: "زۆر سوپاسی ئەم پێشوازییە گەرمە دەکەم کە لێم کرا. ئەمڕۆ ڕۆژێکی تایبەت و پڕ لە خۆشییە لە ژیانمدا، چونکە لێرە لە جزیرەی بۆتان بەشداری لە کارەکانی چوارەمین سیمپۆزیۆمی نێودەوڵەتی مەلای جزیری دەکەم".
هەروەها گوتی: "مەلای جزیری ئەستێرەیەکی گەشە کە هەرگیز ڕووناکییەکەی کز نابێت، ئەو قیبلەنوایەکی ڕۆحییە بۆ ئەویندارانی ڕێگای حەق. شیعرەکانی نەمرن و پیر نابن، چەندە کات تێپەڕێت مرۆڤ وا هەست دەکات کە ئێستا گوێی لێ دەگرێت. هەرچەندە زیاتر قوڵ ببمەوە لە ناو شیعرەکانی جزیریدا، زیاتر لێی نزیک دەبمەوە و پەیوەست دەبم بە ڕۆحی داهێنەرانەیەوە".
سەرۆک مەسعود بارزانی، سوپاسی بێپایانی خۆی ئاراستەی ڕەجەب تەیب ئەردۆغان سەرۆک کۆماری تورکیا و عەبدوڵڵا ئۆجەلان ڕێبەری پارتی کرێکارانی کوردستان (پەکەکە) کرد، لە بەرامبەر دەستپێکردنی پڕۆسەی ئاشتی لە تورکیا.
سەرۆک بارزانی هەروەها گوتی: "ئێمە زۆر خۆشحاڵین بە پڕۆسەی نوێی ئاشتی کە ئەمجارە زۆر بە ئاسانی و ڕەوانی دەستی پێکردووە، چونکە گەل و پەرلەمان و هەموو حزبە سیاسییەکان پشتیوانی لە دەوڵەت دەکەن".
سەرۆک بارزانی زیاتر گوتی: "دەمەوێت سوپاسی سەرۆک ڕەجەب تەیب ئەردۆغان و گەل و پەرلەمان بکەم بۆ دووبارە کردنەوەی دەرگا لە بەردەم ئاشتیدا و بڕوامان وایە کە ئەمە باشترین بژاردەیە".
لە کۆتاییدا سەرۆک بارزانی گوتی: "هەروەها سوپاسی بەڕێز ئۆجەلانیش دەکەم بۆ هەنگاوە ئەرێنییەکانی. ئێمە جەخت لە پشتیوانی خۆمان دەکەینەوە بۆ پڕۆسەی ئاشتی بە هەموو هێزمانەوە، و هەموو هەوڵێکی خۆمان دەخەینە گەڕ بۆ بەدەستهێنانی ئەنجامی ئەرێنی، ئینشائەڵڵا".