پەیامی کورد   ...   وەزارەتی دەرەوەی ئەمریکا : سەرکۆنەی هێرشە درۆنییەکانی سەر کێڵگە نەوتییەکانی کوردستان دەکەین

لە بەردەوامی کاردانەوەی هێرشە درۆنیەکانی سەر هەرێمی کوردستان و بەتایبەتی کێڵگە نەوتییەکانی، تامی برۆس، ووتەبێژی وەزارەتی دەرەوەی ئەمریکا ڕایگەیاندووە : "بەتووندی سەرکۆنەی هێرشکردنەسەر کێڵگە نەوتییەکان دەکەین، چوونکە سەقامگیری عێراق و داهاتووی ڕووبەڕووی مەترسی دەکەنەوە."

برۆس دەشڵێت: "هێرشەکان ئەو کۆمپانیا ئەمریکییانەیان کردووەتە ئامانج کە وەبەرهێنان لە داهاتوو و ووزەی عێراق دەکەن، پێویستە حکوومەتی عێراق بە ئەرکی خۆی جێبەجی بكات و کۆنتڕۆڵی تەواوی خاکەکەی بکات."

جەختیشی کردەوە، "ئەمریکا عێراقێکی خاوەن سەروەری و فیدراڵ و سەقامگری بەلاوە مەبەستە."

لەلایەکی دیکەوە، جۆو ویڵسن، کۆنگرێسمانی ئەمریکی لە تۆڕی کۆمەڵایەتی ئێکس سەبارەت بە هەمان پرس نووسیویەتی: هێرش بۆسەر کۆمپانیا ئەمریکییەکان و کێڵگەکانی نەوت لە هەرێم قبووڵ ناکرێت، پێویستە حکوومەتی عێراق سنوورێک بۆ ئەو هێرشانە دابنێت، بەپێچەوانەوە با خۆی بۆ دەرئەنجامێکی تووند ئامادە بکات.