Ekîba keştiya Îranî ya ku ji aliyê Amerîkayê ve hat desteserkirin, hat derxistin

PeyamaKurd - Ekîba keştiya barhilgir a bi ala Îranê "Touska", ku di 19ê Nîsanê de ji aliyê Hêzên Deryayî yên Amerîkayê ve hatibû desteserkirin, bo Pakistanê hat derxistin. Hat ragihandin ku ekîba 22 kesan dê radestî Îranê bê kirin û piştî temîrkirinê keştî dê vegere xwediyê wê.

Berdevkê Wezareta Derve ya Pakistanê, Tahir Hossein Andrabi, bi rêya platforma X ragihand ku ekîba 22 kesan gihîştiye Pakistanê. Andrabi diyar kir ku ekîb dê radestî rayedarên Îranê bê kirin.

Di heman daxuyaniyê de rewşa teknîkî ya Touskayê jî hat nîqaşkirin. Li gorî daxuyaniyê, keştî dê li avên herêmî yên Pakistanê bimîne heta ku temîrên pêwîst temam bibin berî ku vegere xwediyê xwe.

Andrabi diyar kir ku ev pêvajo bi piştgiriya hevdem a herdu aliyên Amerîkî û Îranî tê meşandin û wiha lê zêde kir:

"Keştiya Îranî wê li avên herêmî yên Pakistanê bimîne heta ku temîrên pêwîst temam bibin berî ku vegere xwediyê xwe yê eslî. Pakistan tedbîrên avakirina baweriyê pêşwazî dike û ji bo aştî û ewlehiya herêmî diyalog û dîplomasiyê hêsan dike."

Berdevkê CENTCOMê Tim Hawkins jî ji ABC Newsê re piştrast kir ku ekîba Touskayê bo Pakistanê hatiye veguhastin. Hawkins diyar kir ku pêvajoya vegerandina keştiyê bo xwediyê wê berdewam dike.