Îranê êrîşeke berfireh li ser baregeha Amerîkî ya El Dafrayê ya Îmaratê pêk anî

PeyamaKurd - Sipahê Pasdarên Rejîma Îranê îro sibehê bi daxuyaniyekê ragihand ku wan bi hejmareke mezin ji dronên kamîkaze êrîşî Baregeha Hewayî ya El Dafrayê ya li Îmaratên Yekbûyî yên Erebî (ÎYE) kirine.

Ev baregeh wekî yek ji mezintirîn navendên leşkerî yên Dewletên Yekbûyî yên Amerîkayê (DYA) li herêma Kendavê tê naskirin û ji bo operasyonên hewayî yên Amerîkî xwedî girîngiyeke stratejîk e.

Di daxuyaniya fermî ya Sipahê Pasdaran de hat destnîşankirin ku di vê êrîşa bi dronan de, armancên krîtîk ên leşkerî hatine hedefgirtin.

Li gorî daxuyaniyê: "Navenda şerê hewayî, navenda ragihandina peykê, radarên hişyariya zû û radarên kontrolkirina agir ên hêzên Amerîkî hatine lêdan."

Ev êrîş wekî bersiveke rasterast bo rageşiyên zêde yên di navbera Tehran û Washingtonê de tê şîrovekirin.

Baregeha El Dafrayê ji bo parastina asmanî ya herêmê û kontrolkirina operasyonên hewayî di rewşên krîtîk de xwedî rol e.

Heta niha ji aliyê fermî yê Amerîkayê ve derbarê zirarên madî an canî yên vê êrîşê de daxuyaniyek nehatiye dayîn, lê belê ev pêşketin dibe sedem ku rewşa ewlehiyê ya li herêma Kendavê hêj aloztir bibe.

Çavdêrên siyasî diyar dikin ku hedefgirtina baregeheke leşkerî ya li axa Îmaratê, qada şer ji Iraq û Sûriyeyê derbasî sînorên nû yên Kendavê kiriye.