Îranê îdiayên derbarê ‘rêkeftina bi Hindistanê re’ ya li Tengava Hurmizê red kirin

PeyamaKurd - Rayedarên fermî yên Îranê nûçeyên derbarê çêkirina rêkeftineke taybet bi Hindistanê re ji bo hêsankirina derbasbûna tankerên petrolê di Tengava Hurmizê re bi tundî red kirin.

Tehranê tekez kir ku tu guhertin di polîtîkaya wan a deryayî de çênebûye û tu cudahî nakeve navbera keştiyên Hindistanê û welatên din.

“Tu peymaneke taybet tune ye”

Li gorî nûçeya ajansa Reutersê ya îro (12ê Adara 2026an), berê hatibû îdiakirin ku Tehranê ji bo derbasbûna tankerên bi alaya Hindistanê sozên hêsankirinê dane New Delhiyê. Lê belê, berpirsekî fermî yê Îranê ji ajansê re axivî û ev îdia li derewan gerand:

Tu peyman an rêkeftineke wisa tune ye ku keştiyên Hindistanê ji yên welatên din cuda bike. Ew nûçe ne rast in.”

Giringiya stratejîk a Hurmizê ji bo Hindistanê 

Hindistan di asta cîhanê de yek ji hawirdekarên herî mezin ên petrolê ye û ji bo dabînkirina enerjiya xwe bi giranî berê xwe dide herêma Kendavê. Ji ber vê yekê, girtina Tengava Hurmizê yan jî astengkirina trafîka deryayî rasterast bandoreke neyînî li ser aramiya aborî ya Hindistanê dike û dibe sedema bilindbûna bihayê sotemeniyê di nav wî welatî de.

New Delhi di navbera Washington û Tehranê de 

Ji ber metirsiya krîza enerjiyê, hikûmeta New Delhiyê bi berdewamî hewl dide di navbera peywendiyên xwe yên bi Washington û Tehranê de hevsengiyekê biparêze. Her çend Hindistan hewl dide rêyeke ewle ji bo keştiyên xwe peyda bike jî, helwêsta dawî ya Îranê nîşan dide ku Tehran di mijara girtina tengavê de hîn jî helwêsteke hişk dişopîne û di vê qonaxa şer de naxwaze tu îstîsnayan nas bike.

Ev rageşî di demekê de ye ku ji ber şerê herêmî, trafîka deryayî li Tengava Hurmizê hema bêje hatiye rawestandin û lêçûnên sîgorte û ewlehiyê yên keştiyan gihîştine asta herî bilind.