Nêçîrvan Barzanî bi Zayed El Nehyan re civiya

PeyamaKurd - Serokê Herêma Kurdistanê Nêçîrvan Barzanî û Serokê Mîrnişînên Erebî yên Yekbûyî  Şêx Mihemed bin Zayed Al Nahyan li Ebû Zebî civiyan. Ev lûtkeya dîplomatîk di demekê de pêk hat ku Rojhilata Navîn di nav krîzên giran ên ewlehî û aborî de derbas dibe.

Serokatiya Herêma Kurdistanê ragihand ku di hevdîtina her du serkirdeyan de, li ser xurtkirina pêwendiyên dîplomatîk, aborî û bazirganî lihev kirine. Nêçîrvan Barzanî û Mihemed bin Zayed tekez kirin ku divê hejmara projeyên geşepêdanê yên hevbeş werin zêdekirin daku xizmeta berjewendiyên her du aliyan bikin.

Di civînê de mijarên mîna ewlehiya enerjiyê û veberhênanên di warê binesaziyê de bi berfirehî hatin gotûbêjkirin. Ev yek nîşan dide ku Îmarat dixwaze roleke hîn çalaktir di avakirina aboriya Herêma Kurdistanê û Iraqê de bilîze.

Dîplomasî mifteya aramiya herêmê ye

Mijareke din a sereke ya civînê, rageşiya ku li Rojhilata Navîn her diçe zêde dibe û bandora wê ya li ser ewlehiya cîhanî bû. Her du serokan hişyarî dan ku istikrarsaziya li herêmê metirsiyên mezin bi xwe re tîne û ji bo parastina aştiyê, kordînasyona di navbera welatên herêmî û hêzên navneteweyî de "heyatî" ye.

 Barzanî û Bin Zayed li ser wê yekê li hev kirin ku ji bo çareserkirina krîzên niha, divê dîplomasî di rêza yekem de be û ji bo dûrxistina metirsiyan, pêwîstiya herêmê bi tevgereke hevbeş û yekgirtî heye.