Joe Kent: Derbarê Kurdan û Îranê de agahiyên xelet dan Trump

PeyamaKurd - Rêveberê berê yê Navenda Neteweyî ya Têkoşîna Dijî Terorê ya DYAyê Joe Kent, derbarê polîtîkaya Îranê ya rêveberiya Donald Trump de daxuyaniyên tûj dan. Kent, ku di destpêka şerê li dijî Îranê de ji wezîfeya xwe îstifa kiribû, diyar kir ku rayedarên Îsraîlê "xeyalek" firotine Trump û jê re gotine bi çekdarkirina Kurdan û mûxalîfên Îranî wê rejîma Tehranê di demeke kurt de hilweşe. Kent destnîşan kir ku ev plan ne li ser rastiyên li qadê, lê li ser daxwazên Îsraîlê hatibû avakirin da ku Washingtonê bi awayekî rasterast bikişînin nav şerê li dijî Îranê.

"Kurd hevparên me yên krîtîk in"

Joe Kent di daxuyaniya xwe de parastina hêzên Kurd kir û destnîşan kir ku ew di têkoşîna dijî terorê de hevparên herî krîtîk ên Amerîkayê ne. Kent bang li Trump kir ku hêrsa xwe ne li ser Kurdan, lê li ser rayedarên Îsraîlî birêje ku agahiyên îstîxbaratî yên xelet dane wî. Li gorî Kent, armanca bingehîn a Îsraîlê ne hilweşandina rejîmê bi tenê bû, lê neçarkirina DYAyê bû ku şerê li dijî Îranê bi serê xwe bimeşîne. Wî got ku îstîxbarata derbarê Îranê de bi zanebûn hatibû guhertin da ku Amerîka bikeve nav vî şerî.