Mazlûm Ebdî bi Parêzgarê Hesekê re civiya

PeyamaKurd - Fermandarê Giştî yê Hêzên Sûriya Demokratîk (HSD) Mazlûm Ebdî îro bi Parêzgarê Hesekê Nûreddîn Ehmed re civiya.

Li gorî North Press, di civînê de li ser çareseriyên krîza ji ber kêmbûna sotemeniyê û bilindbûna bihayê sotemeniyê çêbûye nîqaş hatin kirin.

Aliyan rewşa heyî ya di xizmetên enerjî, elektrîk û avê de jî nirxandin û pêşniyarên ji bo çareserkirina pirsgirêkên li van deveran nîqaş kirin.

Geşedanên dawî yên di pêvajoya veguhestina zeviyên petrolê bo Wezareta Petrolê ya Sûriyeyê de jî hatin nîqaşkirin.

Mazlûm Ebdî û Nûreddîn Ehmed di derbarê avakirina mekanîzmayeke piştgiriyê ya taybet ji bo Hesekê de jî nêrînên xwe parve kirin.

Civîn di demekê de pêk hat ku pirsgirêkên têkildarî xizmetên giştî yên bingehîn li herêmê zêde dibin û hewldanên ji bo çareserkirina van pirsgirêkan berdewam dikin.

Di vê navberê de, hat ragihandin ku welatiyên ku li dijî lêçûna jiyanê ya bilind nerazîbûn nîşan didin, di rojên dawî de li herêmên cuda xwepêşandan li dar dixin.