Rêhewaya Tirkiyê û Kurdistanê vebû!

Piştî 6 mehan di navbera Tirkiyê û Kurdistanê de balafirên sivîl derketine rê.

Balafira pêşî ji Stenbolê rabû û berê xwe da Hewlêrê.

Ji ber referandûma 25ê Êlûnê, Tirkiyê rêhewaya xwe ji ber balafirên Kurdistanê girtibû û heta duh jî ev rêhewa girtî bû.

Welatiyê Kurdistanê ji ber vê geşedanê gelekî memnûn bûn.

Welatiyekî bi navê Brahîm Xelîl di derbarê vekirina rêhwayê de memnûniyeta xwe nîşan da û wiha got: Serê sê çar mehan carekê ez û malbata xwe têne Stenbolê. Em dixwazin ji xwe re li van deran bigerin. Bi rastî jî ev baş çêbû. Ev çend heyv in me nikarîbû here û were. Niha rewş gelekî baştir e.

Welatiyeke bi navê Bihar jî wiha got: Ez jî bi kufletê xwe re hatime Stenbolê. Ev geşedan baş bû, em memnûn in. Em naxwazin bi miletê cîranên xwe re, ne li hev bin.