Serok Barzanî pêşwazî li Serokê Destpakiya Iraqê kir: Ji bo ti kes û aliyekî xeta sor nîne
PeyamaKurd - Serok Mesûd Barzanî, îro Çarşemê 26ê Tebaxê li Pîrmamê, pêşwazî li Serokê Lijneya Destpakiyê ya Iraqê Dr. Mihemed Elî El-Lamî û şandeya pê re kir.
Di civîna ku Serokê Lijneya Destpakiya Herêma Kurdistanê Dr. Ehmed Enwer jî amade bû de, mijara şerê li dijî gendeliyê û hevahengiya di navbera Bexda û Hewlêrê de hatin gotûbêjkirin.
Dr. Mihemed Elî El-Lamî di civînê de agahî dan Serok Barzanî û bal kişand ser rêbaz û gavên rûbirûbûna gendeliyê û parastina samana giştî li Iraqê û hewldanên Serokwezîrê Iraqê û astengiyên di vê pêvajoyê de.
El-Lamî ji bo rola dîrokî ya Serok Barzanî di avakirina Iraqê de, spasî û pesnê hevahengiya saziyên Herêma Kurdistanê da û daxwaza piştgiriyê kir da ku gendelî li seranserî Iraqê bê rawestandin.
Serok Barzanî piştgiriya xwe ya temam ji bo hewldanên hikûmeta federal di rûbirûbûn û cezakirina gendelakaran de ragihand û ew wekî "erke mezin û pîroz" bi nav kir.
Serok Barzanî tekez kir ku bi ti awayî rê nade ku Herêma Kurdistanê bibe sitargehek ji bo gendelakaran û got: "Ji bo ti kes û aliyekî xeta sor nîne. Serkeftina vê pêvajoyê pêwîstî bi berdewamiyê heye û divê ji bo pêkanîna edaletê were meşandin."