Analîza El Cezîreyê: Stratejiya Amerîka-Îsraîlê ya li dijî Îranê encamên bi bandor dide
PeyamaKurd - Analîstê siyaseta navneteweyî û ewlehiyê Muhanad Seloom, di analîzeke taybet de ji bo tora El Cezîreyê, destnîşan kir ku stratejiya leşkerî ya Amerîka û Îsraîlê ya li dijî Îranê, ji ya ku dihat hêvîkirin pir zêdetir encamên bibandor bi dest xistine.
Seloom îdia dike ku ev operasyona sîstematîk binesaziya hêza Îranê ya li herêmê bi giranî herifandiye.
Şiyanên leşkerî yên Îranê %90î kêm bûne
Li gorî analîza Seloom, kapasîteya Îranê ya avêtina mûşekên balîstîk û dronan bi lez dakiye asta herî jêr. Daneyên leşkerî nîşan didin ku di çalakiya mûşekî ya Îranê de %90î kêmbûnek çêbûye. Her wiha tê nirxandin ku %80yê şiyana Îranê ya ji bo lêdana axa Îsraîlê ji holê hatiye rakirin.
Seloom destnîşan dike ku hêza deryayî, pergalên parastina hewayî û avahiya fermandariya leşkerî ya Tehranê derbeyên kujer xwarine.
Seloom diyar dike ku operasyon bi du qonaxên stratejîk tê meşandin. Di qonaxa yekem de, parastina hewayî û sîstemên fermandariyê hatin rûxandin da ku Îran bêparastin bimîne. Di qonaxa duyem de jî, pîşesaziya parastinê, navendên lêkolînê û tesîsên hilberîna mûşekan hatin hedefgirtin.
Armanca vê pêngavê ew e ku rê li ber Îranê were girtin da ku nekaribe di demeke nêz de şiyanên xwe yên leşkerî ji nû ve ava bike.
Analîz balê dikişîne ser zirara giran a li binesaziya nukleerî ya Îranê. Tê gotin ku tesîsa Natanzê zirar ditiye û tesîsa Fordowê jî ji kar ketiye. Seloom her wiha girtina Tengava Hurmizê ji aliyê Îranê ve wekî “gava ne domdar” pênase dike; ji ber ku ev girtin herî zêde zirarê dide aboriya Îranê bixwe ku pişta xwe bi hinardekirina petrolê girê dide.
Yek ji encamên herî berçav ên operasyonê, lawazbûna pêwendiya Tehranê bi hêzên xwe yên wekîl ên li herêmê re ye. Seloom dibêje ku Hizbullah, milîsên Iraqê û Hûsiyên Yemenê her çend êrîşên xwe bidomînin jî, êdî bê hevrêziyeke navendî tevdigerin. Ev yek nîşan dide ku mekanîzmaya kontrolê ya Îranê li herêmê her ku diçe bêtir îzole dibe û dihele.
Her çend operasyonê bihayekî giran ê mirovî û aborî (mirina sivîlan û bilindbûna bihayê petrolê) bi xwe re anîbe jî, Seloom bawer dike ku encamên stratejîk giringtir in. Li gorî wî, operasyonê gefa nukleerî ya Îranê bi girîngî paş xistiye û hevsengiya hêzê li Rojhilata Navîn bi awayekî mayînde guherandiye.