Bi dronan êrîşê mezintirîn rafîneriya petrolê ya Siûdiyê hat kirin

PeyamaKurd – Di roja sêyemîn a şerê mezin de, mezintirîn rafineriya petrolê ya Erebistana Siûdî û cîhanê, Saudi Aramco, bû hedefa êrîşeke dronî. Agir bi rafineriya Ras Tanura ket, lê rayedaran ragihand ku agir di demeke kurt de hatiye kontrolkirin û ji bo ewlehiya karkeran rafinerî bi awayekî demkî hatiye girtin.

Erebistana Siûdî ku rojane zêdetirî 10 mîlyon bermîl petrol hildiberîne, stûna sereke ya bazara enerjiyê ye. Ev êrîş di demekê de pêk tê ku asmanê herêmê ji ber mûşekên balîstîk girtî ye û Îranê berê di 28ê Sibatê de bi mûşekan êrîşî baregeha hewayî ya Prens Siltan a li nêzî Riyadê kiribû.

Her çend tu aliyekî berpirsiyarî negirtibe ser xwe, lê gumanên sereke li ser mîlîsên nêzî Tehranê ne ku dixwazin bi rêya krîza petrolê zextê li ser Amerîka û hevalbendên wê bikin.

Operasyona Kûrena Şêr niha ne tenê şerekî leşkerî ye, belê veguheriye şerekî aborî yê berfireh. Piştî kuştina Ayetullah Elî Xameneyî û 41 leşkerên Amerîkî li ser sînoran, lêdana tesîsên Aramco nîşan dide ku tu sînor ji bo tolhildanê nemane.

Li gorî zanyariyên herî dawî, agir li Ras Tanura hat kontrolkirin û xeterî derbas bûye, lê Aramco ji bo ewlehiyê hilberîn bi awayekî demkî sînordar kiriye. Hêzên asmanî yên Siûdî û pergalên parastinê di rewşa amadebaşiya herî bilind de ne.