Derbeyeke nû li Tehranê: Berdevkê Pasdarên Şoreşê Elî Mihemed Naînî hat kuştin

PeyamaKurd - Televîzyona dewletê ya Îranê bi daxuyaniyeke fermî ragihand ku Berdevkê Hêzên Pasdarên Şoreşa Îslamî, Tuggeneral Elî Mihemed Na’înî jiyana xwe ji dest daye. Ev rûdan wekî derbeyeke din a giran li ser hiyerarşiya leşkerî ya Îranê, di nava şerê berdewam de tê nirxandin.

Saetekê piştî daxuyaniya wî hat kuştin 

Balkêş e ku nûçeya mirina Na’înî bi tenê saetekê piştî daxuyaniyên wî yên dawî yên ji bo medyayê hate belavkirin. Na’înî di gotinên xwe yên dawî de bal kişandibû ser şerê bi Amerîka û Îsraîlê re û daxuyaniyên bîrawer dabûn.

Daxuyaniya wî ya dawî: “Hilberîna mûşekan berdewam dike”

Tûggeneral Na’înî berî ku were kuştin, diyar kiribû ku tevî êrîşên giran ên li ser Îranê, binesaziya wan a leşkerî zirar neditiye. Naînî gotibû:

Hilberîna me ya mûşekan di rewşeke pir baş de ye; hilberîn heta di dema şer de jî bê navber berdewam dike.” Wî her wiha tekez kiribû ku di derbarê şiyanên leşkerî yên Îranê de tu fikarên wan nînin.

Rageşiya li herêmê gihîşt lûtkeyê

Heta niha derbarê cih û çawaniya kuştina wî de hûrgiliyên zelal nehatine parvekirin. Lê belê, çavdêrên siyasî destnîşan dikin ku hedefgirtina berdevkê herî bilind ê Pasdaran nîşan dide ku sîstema îstîxbaratî û parastinê ya Tehranê rû bi rûyî herifîneke mezin e.

Piştî vê rûdanê, aloziyên li Rojhilata Navîn hîn zêdetir bûne û tê pêşbînîkirin ku pevçûnên di navbera Îran û eniya Amerîka-Îsraîlê de ber bi qonaxeke hîn tundtir ve biçin.