FT: Trump şer dijwar bike, Îran difikire êrîşî Ewropayê bike

PeyamaKurd - Li gorî nûçeya rojnameya Financial Timesê (FT) ku dispêre çavkaniyên nêzîkî hikûmeta Îranê, heke Serokê DYAyê Donald Trump şer giran bike, Tehran vebijarkên êrîşkirina li ser armancên leşkerî yên Amerîkayê yên li Başûrê Rojhilatê Ewropayê difikire.

Hate ragihandin ku di nav van hedefan de Binkeya Asmanî ya Bezmerê ya li Bulgaristanê û Binkeya Asmanî ya Brîtanyayê ya li Başûrê Qibrisê hene ku berê ji aliyê balafirên DYAyê ve hatibûn bikaranîn.

Çavkaniyan destnîşan kirin ku di berteka Tehranê ya li hemberî operasyonên leşkerî yên Amerîkayê de dê ti "sînor" tune bin û ev rewş hişyariyeke eşkere ye ji bo welatên Ewropayê ku di nav aloziyê de helwesta xwe diyar bikin.

Ji aliyê din ve analîstên leşkerî diyar dikin ku Îran dikare bi moşekên balîstîk ên navîn binkeyên DYAyê yên li Ewropayê bike hedef, lê gumanên rastlêdana van moşekan û hejmara enbara çekan a di destê Tehranê de jî hene.