Îmarat: Me êrîşeke mezin a Îranê pûç kir

PeyamaKurd - Wezareta Berevaniyê ya Mîrnişînên Erebî yên Yekbûyî (Îmarat) ragihand ku hêzên wan ên parastina asmanî 8 moşekên balîstîk, 4 moşekên krûz û 36 balafirên bêmirov yên ku ji aliyê Îranê ve hatibûn avêtin, bi serkeftî asteng kirine.

Li gorî daxuyaniyê, ji destpêka şer û vir ve bi giştî zêdetirî 400 moşekên balîstîk û nêzîkî 2 hezar dron hatine pûçkirin. Di van êrîşan de heta niha 2 leşkerên îmaratê û 9 sivîlên ji neteweyên cuda jiyana xwe ji dest dane.

Wezareta Berevaniyê herwiha eşkere kir ku di encama pevçûnan de heta niha 188 kes birîndar bûne, ku di nav wan de welatiyên gelek welatan hene. Îmaratê tekez kir ku ew ji bo parastina serwerî û ewlehiya welatê xwe li hemberî her cure gefan di amadebaşiyê de ne û dê bi biryardarî bersiva her hewildaneke ku aramiya herêmê xira dike bidin.