Îranê wezîrê parastinê yê nû tayîn kir: Seyîd Mecîd Ibn Riza dest bi kar kir

PeyamaKurd - Di demekê de ku rageşiya leşkerî ya li herêmê di asta herî bilind de ye, Îranê guhertinek di lûtkeya wezareta parastinê de pêk anî.

Fermandarê Artêşê Seyîd Mecîd Ibn Riza bi fermî wekî Wezîrê Parastinê yê nû yê Komara Îslamî ya Îranê hat tayînkirin û dest bi erkê xwe kir.

Li gorî nûçeyên ku îro 30ê Adarê di medyaya dewleta Îranê de hatine belavkirin, Ibn Riza piştî merasîma destbikarbûnê, yekemîn gava xwe ya dîplomatîk avêt. Wezareta Parastinê ragihand ku Ibn Riza bi hevtayê xwe yê Tirk re peywendiyeke telefonî pêk aniye û her du aliyan li ser rewşa ewlehiyê ya herêmê û pêşketinên dawî nîqaş kirine.

Wezîrê nû yê parastinê Seyîd Mecîd Ibn Riza, di yekemîn peyama xwe ya fermî de helwesteke tund nîşan da û peyama tolhildanê da. Ibn Riza derbarê êrîşên dawî yên li ser Îranê de got:

Komara Îslamî dê di cezakirina êrîşkaran de bi biryardarî berdewam bike û tu êrîşek dê bêbersiv nemîne."

Tayînkirina Ibn Riza di rojeke krîtîk de pêk tê ku tê de Îranê piştrast kir çendîn rayedarên payebilind ên leşkerî, di nav de Serfermandarê Hêzên Deryayî Elî Riza Tengsîrî, di êrîşên Amerîka û Îsraîlê de hatine kuştin. Çavdêrên siyasî diyar dikin ku tayînkirina Ibn Riza wekî hewildanek ji bo ji nû ve birêxistinkirina eniya parastinê ya Îranê li hemberî operasyonên hewayî û bejayî yên muhtemel tê nirxandin.