Îsraîlê li Lubnanê xist: Îranê hişyariya "tolhildanê" da!

PeyamaKurd - Tevî rêkeftina di navbera Amerîka û Îranê de ji bo bidawîanîna şer, êrîşên asmanî yên Îsraîlê li başûrê Lubnanê berdewam dikin. Piştî êrîşan, ku çar kes  hatin kuştin, Îranê Îsraîl bi binpêkirina agirbestê 84 caran tawanbar kir û hişyarî da "tolhildana tund".

Li gorî ajansa nûçeyan a fermî ya Lubnanê NNA, îro balafirên bêpîlot ên Îsraîlê li bajarokên Mays el-Cebel û Şûkîn ên li herêma Nebatiyeyê sê wesayît hedef girtin. Di êrîşê de çar kes mirin û gelek kes birîndar bûn.

Daxuyaniyek ji Baregeha Navendî ya Xetam el-Enbiya ya Sipaha Pasdarên Şoreşa Îranê (IRGC) îdia kir ku ji dema ku Serokê Amerîkayê Donald Trump dawiya şer ragihand, artêşa Îsraîlê 84 caran agirbest li başûrê Lubnanê binpê kiriye. Di daxuyaniyê de hat gotin ku Îsraîl "komkujî û sûcên" xwe yên li dijî gelê Lubnanê didomîne û wiha hat gotin:

"Divê artêşa Îsraîlê li bendê be ku bersivek pir tund ji Hêzên Çekdar ên Îranê were."

Wezîrê Derve yê Îranê Ebas Araqçî diyar kir ku rêkeftina ku bi Amerîkayê re hatiye çêkirin wê roja Înê bi fermî bikeve meriyetê. Arakçî got, "Ragihandina bidawîbûna şer hêmana herî bingehîn a qonaxa yekem a vê peymanê ye."

Arakçî bal kişand ser aloziyên herêmî û xetera pevçûnê bi Îsraîlê re û hişyarî da ku her êrîşeke Îsraîlê li ser Lubnanê wê wekî binpêkirina peymana bi DYA re were hesibandin.