Kubayê bi tundî bertek nîşanî cezayên nû yên Amerîkayê da!

PeyamaKurd - Hikûmeta Kubayê bertek nîşanî biryara rêveberiya Amerîkayê ya danîna şîrketên girêdayî GAESA, şîrketeke holdingê ku ji aliyê artêşa Kubayê ve tê kontrolkirin û li ser aboriya welêt serdest e, da.

Di daxuyaniyekê de li ser medyaya civakî, Wezîrê Derve yê Kubayê Bruno Rodriguez cezayên nû yên ku hikûmeta giravê hedef digirin wekî "sûc" bi nav kir.

Rodriguez, Wezîrê Derve yê Amerîkayê Marco Rubio bi tundî şermezar kir û diyar kir:

"Hikûmeta Amerîkayê ku ji aliyê Wezîrekî Derve yê bêrûmet û derewîn ve tê rêvebirin, dorpêça xwe ya li ser aboriya me tundtir dike ji ber ku aboriya Kubayê li hember êrîşkariya hovane û cezayên kolektîf ên li dijî gel û şert û mercên jiyana wan ji ya ku tê hêvîkirin xurttir, jêhatîtir û bibandortir derdikeve holê. Tiştê ku ev kes li serê hêza herî mezin a cîhanê teşwîq dike sûc e."