Li Sûdanê 83 kes mirin û 1126 kes jî birîndar bûn
PeyamaKurd – Rêxistina Tenduristiyê ya Cîhanê (WHO) ragihand, di pevçûnên ku di 15ê Nîsanê de li Sûdanê di navbera artêş û Hêzên Piştgiriya Lezgîn (HDK) de destpê kiribû de, 83 kes mirin û 1126 kes jî birîndar bûn.
Li Sûdanê do jî li bajarên cuda û li paytext Xartûmê di navbera artêş û HDKê de pevçûnên dijwar didomin.
WHO di daxuyaniya xwe ya da de got, “Ji 15ê Nîsanê û vir ve, di pevçûnên li Xartûm, Başûrê Kurdufan, Bakurê Darfûr û eyaletên Bakur û li herêmên cuda de herî kêm 83 kes mirin û 1126 kes jî birîndar bûn. Pevçûnên herî tund li Xartûmê diqewimin."
Lê belê Komeleya Doktorên Sûdanê do daxuyaniyek da û ragihand, hejmara miriyan hîn zêdetir e. Di daxuyaniyê de hat gotin, "Di pevçûnên li Sûdanê de herî kêm 97 sivîlan jiyana xwe ji dest dan û 365 sivîl jî birîndar bûn."
WHO destnîşan kir, pevçûnan di gihandina nexweşan û xebatkarên tenduristiyê yên nexweşxaneyan de pirsgirêk û kêmasiyên cidî yên hin derman û pêdiviyên bijîjkî peyda kirine, WHO ji aliyên şer xwest ku di gihandina karûbarên tenduristiyê de rêzê li bêalîbûnê bigirin û gihandina bêsînor a saziyên tenduristiyê garantî bikin ji bo kesên ku di pevçûnan de birîndar bûne.
WHO ji bo parastina birîndaran, nexweşan, sivîlan, xebatkarên tenduristiyê, ambûlans û tesîsên tenduristiyê, erkên xwe yên li gorî hiqûqa însanî ya navneteweyî bi bîr xist.
15ê Nîsanê danê sibê li bajarê Xartûmê yê paytexta Sûdanê û li gelek bajaran di navbera artêşa Sûdanê û HDKa paramîlîter de pevçûnên çekdarî derketin.
Nakokiyên di navbera artêş û HDKê de li ser reforma ewlekariya leşkerî ya ku "tevlîbûna HDKê ya artêşê" dimeşîne, di van çend mehên dawî de veguherî pevçûnek germ.