Macron û Trump li ser ewlehiya Tengava Hurmizê axivîn: Fransa amade ye

PeyamaKurd - Serokkomarê Fransayê Emmanuel Macron ragihand ku wî duh bi şev bi Serokê Amerîkayê Donald Trump re peywendiyeke telefonî encam daye û tê de hewldanên wî yên bibiryar ên ji bo gihîştina peymaneke bilez di navbera Washington û Tehranê de bilind nirxandiye.

Macron tekez kir ku Parîs amade ye piştgiriya van hewldanan bike û di dema pêkanîna lihevkirinê de berpirsyariya dikeve ser milê xwe bi cih bîne.

Serokkomarê Fransayê bal kişand ser mîsyona deryayî ya piralî û parastinê ya ku ji bo dabînkirina ewlehiyê û ji nû ve vekirina Tengava Hurmizê hatiye avakirin û wiha got: "Ev armanca serekî ya mîsyona navdewletî ew e ku me ligel Brîtanya û şirîkên xwe ava kiriye. Gava ku lihevkirin çêbibe ev mîsyon dê yekser bikeve dewrê."

Macron herwiha diyar kir ku ew amade ne di danûstandinên berfireh ên ku dê li nêzîk dest pê bikin, bi taybetî di rûberê pirsa nukleerî de, pisporî û derfetên xwe pêşkêş bikin.

Helwesta li ser serweriya Libnanê û daxwaza agirbesteke mayînde

Macron li ser geşedanên herî dawî yên li başûrê Libnanê jî kêfxweşiya xwe ya li beramberî girêdayîbûna Serokê Amerîkayê Donald Trump a ji bo serwerî û parastina yekparçeyiya xaka Libnanê anî ziman û diyar kir ku ew girîngiyeke mezin didin agirbesteke mayînde û domdar a li herêmê daku rê li ber karesatên hîn mezintir bê girtin.

Wî tekez kir ku piştgiriya kolektîf a navdewletî ya ji bo saziyên fermî û rayedarên Libnanê di vê qonaxa krîtîk de xwedî girîngiyeke jiyanî ye da ku aramiya herêmî bê parastin.