Nakokî kûr bû: Hevpeymaniya Şîeyên Iraqê bûne du beş

PeyamaKurd - Hevpeymaniya Çarçoveya Hevahengiyê ya ku nûnertiya piraniya hêzên Şîe li Iraqê dike, di civîna xwe ya şeva 20ê Nîsanê de nekarî li ser namzedê serokwezîrtiyê li hev bike.

Civîna ku li ofîsa Emar Hekîm bi awayekî nepenî û di bin tedbîrên tund de hat lidarxistin, bi dabeşbûneke kûr bi dawî bû. Tevî ku maseya ragihandina namzed amade bû jî, ji ber ku tu namzedekî nekarî 8 dengên pêwîst (ji sedî 66) bi dest bixe, civîn bêencam ma.

Di nava du namzedên sereke de, Basim Bedrî piştgiriya 7 lîderan û Îhsan Ewadî jî piştgiriya 5 lîderan wergirt, ku vê yekê hevpeymanî kir du bereyên dijberî hev.

Berdevkê Hevpeymaniya Nesrê Eqîl Ridênî ragihand ku ev cara yekem e Çarçoveya Hevahengiyê bi vî rengî parçe dibe.

Hate diyarkirin ku nakokiya sereke li ser şêwaza dengdanê ye; hinek alî dixwazin li ser bingeha "hêza siyasî" û hinek jî li ser bingeha "hejmara kursiyan" biryar were dayîn. Herwiha tirseke mezin li cem aliyan heye ku eger bêyî lihevkirineke tam biçin parlamentoyê, kabîneya wan dengê pêbaweriyê nestîne. Ji ber van nakokiyan, biryar hat dayîn ku nîqaş heta 22yê Nîsanê berdewam bikin daku beriya roja şemiyê navekî hevbeş were eşkere kirin.