Peyama Kiliçdaroglu ji hilbijêrên li derve re
PeyamaKurd – Namzedê Serokomariyê yê Tifaqa Milletê Kemal Kiliçdaroglu bi vîdeoya ku li ser medyaya civakî parve kir bang li welatiyên ku wê li derveyî welêt dengê xwe bidin kir.
Kiliçdaroglu ji bo welatiyên li derveyê welat çend soz dan û got, "Bêguman em vê carê ji xwe bawer û bi biryartir in. Ez bang li we dikim ku pêşî dengê xwe bidin û piştre dengên xwe biparêzin."
Namzedê Serokomariyê yê Tifaqa Millet û Serokê Giştî yê CHPê Kemal Kiliçdaroglu li ser medyaya civakî vîdeoyeke nû parve kir.
Kiliçdarogluyê di vîdeoya bi navê "deynê welat" de, hilbijêrên li derveyî welat vexwend ser sindoqan û sozên nû dan. Daxuyaniyên Kiliçdaroglu wiha ne:
“Gelê min ê hêja, sibê welatiyên li derveyî welat ji bo siberoja welatê me yê xweş wê careke din biçin ser sindoqan.
"Derketina dawî ya welatê me"
Ji ber ku ev mijar niha ji hilbijartinê zêdetir referandum e. We dît piştî referanduma berê em çi derbas bûn. Ev dem ji bo welatê me derketina dawî ye. Werin ser sindoqê û yên derdora xwe bînin ser sindoqê. Deng bidin welatê xwe. Ew ne bangek vala ye. Em pirsgirêkên we û çareseriyên wan baş dizanin.
"Em ê bihayê bilêtên balafirê yên giran daxin astên maqûl"
Ji bo ku hûn di TBMMê de bibin xwedî hêz, em ê li derveyî welat nûnertiya xwe ava bikin. Dema ku hûn li Tirkiyê teqawît bibin û li welatekî din bixebitin, em ê bicîh bikin ku qedexeyên ku li ser we têne sepandin werin rakirin û teqawidiya we were baştir kirin. Hûn ê li Tirkiyeyê bi awayekî wekhev ji xizmetên xwe yên tenduristiyê sûd werbigirin. Em ê gazindên ku dibe ku di pêkanîna peymana parvekirina agahdariya otomatîkî ya ku bi paşguhkirina we ve hatî bicîh kirin de ji holê rakin. Em ê dema mayîna li Tirkiyeyê ya otomobîla ku hûn li derveyî welat bi kar tînin dirêj bikin. Em ê bihayên bilêtên balafirê yên giran daxin astên maqûl.
"Em ê dema bikaranîna telefonên ku hûn bînin Tirkiyeyê dirêj bikin"
Dema hûn werin Tirkiyeyê em ê dema bikaranîna telefonên ku hûn bi xwe re tînin dirêj bikin. Em ê pirsgirêkên birayên xwe bi qertên şîn bi peydakirina derfetên wekhev ên welatiyên xwe re çareser bikin. Em ê gelek gavên din bavêjin. Piştrast bin, em vê carê ji xwe bawertir in. Ez bang li we dikim ku pêşî dengê xwe bidin û pişt re li ser dengên xwe bisekinin. Ji bîr nekin ku di 28ê Gulanê de 1 milyon kes ji bo parastina dengên we dê li ser sindoqan bin. Ez ji dil bawer dikim ku hûn ê piştgiriyê bidin vê têkoşîna demokrasiyê."