Şeş welatan daxuyaniyek krîtîk li ser Tengava Hurmuzê dan

PeyamaKurd - Fransa, Almanya, Îtalya, Japonya, Holanda û Keyaniya Yekbûyî amadebûna xwe ji bo beşdarbûna di hewldanên guncaw de ji bo misogerkirina ewlehiya seyahetê li Tengava Hurmuzê diyar kirin.

Serokên Fransa, Almanya, Îtalya, Japonya, Holanda û Keyaniya Yekbûyî daxuyaniyek hevbeş derbarê Tengava Hurmuzê de weşandin.

Di daxuyaniyê de wiha tê gotin, "Em êrîşên dawî yên Îranê li ser keştîyên bazirganî yên bêçek li Kendavê, êrîşên li ser binesaziya sivîl, di nav de tesîsên petrol û gazê, û girtina Tengava Hurmuzê ji aliyê Hêzên Çekdar ên Îranê ve bi tundî şermezar dikin."

Daxuyanî bi nîşandana fikarên xwe li ser zêdebûna êrîşan li herêmê, wiha domand, "Em bang li Îranê dikin ku gefên xwe, operasyonên danîna mayînan, êrîşên bi dron û moşekan û hemî hewldanên astengkirina seyaheta bazirganî di Tengava Hurmuzê re rawestîne û li gorî biryara 2817 a Konseya Ewlehiyê ya Neteweyên Yekbûyî tevbigerin."

Daxuyanî tekez kir ku azadiya seyahetê yek ji prensîbên bingehîn ên qanûna navneteweyî ye û îdia kir ku bandorên kiryarên Îranê li seranserê cîhanê têne hîskirin.

Diyar kir ku destwerdana derve ya bi vî rengî di veguhestina deryayî ya cîhanî de û astengiyên li zincîrên dabînkirina enerjiyê gefê li aştî û ewlehiya cîhanê diafirîne û banga rawestandina êrîşên li ser binesaziya sivîl, di nav de tesîsên petrol û gazê yên li herêmê kir.

Di daxuyaniyê de wiha hat gotin, "Em amade ne ku beşdarî hewldanên guncaw bibin da ku ewlehiya navîgasyonê li Tengava Deryayî misoger bikin. Em pêşwaziya pabendbûna welatên ku beşdarî plansaziya amadekariyê dibin dikin."

Di daxuyaniyê de herwiha razîbûna xwe ji biryara Ajansa Enerjiyê ya Navneteweyî (IEA) ya destûrdayîna karanîna hevrêz a rezervên petrolê anî ziman û destnîşan kir ku tedbîrên cûrbecûr, di nav de zêdekirina hilberînê, wê bi hevkariya welatên hilberîner werin girtin da ku bazara enerjiyê were aram kirin.