G7an û YEyê êrîşên Îranê yên ser Kurdistanê şermezar kir

PeyamaKurd - Welatên G7 ku ji Amerîka, Brîtanya, Fransa, Almanya, Îtalya, Kanada û Japonyayê pêk tên, tevî Yekîtiya Ewropayê di daxuyaniyeke hevpar de êrîşên Îranê û hêzên wekîl ên bi ser wê ve yên li herêmê, bi taybetî jî yên li dijî jêrxana enerjiyê û nûnertiyên dîplomatîk ên li Herêma Kurdistanê, bi tundî şermezar kirin.

Wezîrên karên derve yên welatan dane xuyakirin ku ev çalakiyên bêperwa rasterast gefê li ewlehiya cîhanî dixwin û piştgiriya xwe ya tam ji bo hevalbendên xwe yên li herêmê nîşan dan. Di daxuyaniyê de hat destnîşankirin ku êrîşên li ser hêzên Hevpeymaniya Navneteweyî û gelê Iraqê nayên qebûlkirin û daxwaz hat kirin ku hemû operasyonên leşkerî yên Îranê yekser û bê merc werin rawestandin.

G7ê bal kişand ser parastina rêyên avî yên krîtîk mîna Tengava Hurmizê û aramkirina bazarên enerjiyê, ku ji bo aboriya cîhanê xwedî girîngiyeke jiyanî ne. Ji rêvebiriya Tehranê hat xwestin ku dawî li bernameya moşekên balîstîk û çalakiyên xwe yên têkder bîne. Her wiha hat destnîşankirin ku divê Îran tu carî nebe xwediyê çekên nukleerî.