Ji hêzên Rojhilat daxuyanîya hevpar: Îran çekên qedexekirî bikar tîne

PeyamaKurd - Hevpeymaniya Hêzên Siyasî ya Rojhilatê Kurdistanê piştî civîna xwe ya Pêncşemê (23ê Tîrmeha 2026an) daxuyaniyek belav kir û bal kişand ser guherînên kûr ên jeopolîtîk û siyasî yên li herêmê.

Di daxuyaniyê de hat diyarkirin ku Komara Îslamî ya Îranê ji ber nakokiyên xwe yên hundirîn û hilweşîna danûstandinên bi DYAyê re, serî li êrîşên leşkerî, drone û moşekan daye û baregehên partiyên siyasî yên li Herêma Kurdistanê kirine armanc.

Hevpeymaniyê destnîşan kir ku îhtîmaleke mezin heye di van êrîşan de madeyên şewatê yên wekî fosfora spî hatibin bikaranîn ku ev yek wekî sûcekî mezin ê şer hate binavkirin.

Şehîdbûna pêşmergeyan û girîngiya stratejîk a yekîtiyê

Di daxuyaniyê de hat gotin ku di encama van êrîşên hovane de hejmarek pêşmergeyên partiyên mîna PAK, Komele, PDKÎ û YRKê şehîd û birîndar bûne.

Hevpeymaniyê sersaxî ji malbatên şehîdan re xwest û teqez kir ku yekgirtina hêzên Kurdistana Îranê ne vebijarkek e, belkî pêdiviyeke stratejîk e daku rê li ber dorpêç û gefên leşkerî bê girtin.