Serok Barzanî û Tom Barrack bi rêya telefonê axivîn
PeyamaKurd - Serok Mesûd Barzanî û Nûnerê Taybet ê Serokê Amerîkayê Donald Trump ji bo Sûriyê, Tom Barrack, tekezî li ser dûrxistina Herêma Kurdistanê û Iraqê ji şerê berdewam û parastina wan kirin.
Serok Barzanî û Nûnerê Taybet ê Amerîkayê ji bo Sûriyê Tom Barrack îro bi rêya telefonê axivîn.
Li gorî daxuyaniyek ji ofîsa Barzanî, di dema pêwendiya telefonê de, Barrack silavên Serok Trump ji Serok Barzanî re gihandin û ji bo serokatiya wî ya aqilmend di misogerkirina siyaset û ewlehiyê de spasiya wî kirin.
Barrack piştrast kir ku Amerîka her gav Herêma Kurdistanê wekî hevalbend û dost dibîne û dê hevkariya xwe li herêmê bidomîne. Wî destnîşan kir ku Herêma Kurdistanê û Iraq ji bo Amerîkayê di herêmê de xwedî cihekî girîng in û piştgiriya welatê xwe ji bo çareserkirina pirsgirêkên di navbera Hikûmeta Herêma Kurdistanê û Hikûmeta Iraqê de bi awayekî ku ji bo her du aliyan sûdmend be, dubare kir.
Mesûd Barzanî herwiha spasiya xwe ji Serok Trump re anî ziman û rola bi bandor a Tom Barrack teqdîr kir.
Serok Barzanî tekez kir ku Herêma Kurdistanê her gav ji bo tevahiya herêmê aramî û aştî xwestiye û gelê Kurdistanê her gav baweriya xwe bi demokrasî, bi hev re jiyan û diyalogê aniye.
Mesûd Barzanî herwiha behsa êrîşên neheq ên li dijî Herêma Kurdistanê ji aliyê hin hêzên neqanûnî ve kir.
Her du aliyan li hev kirin ku divê Herêma Kurdistanê û Iraq ji vê pevçûnê dûr werin girtin û werin parastin.