Şanda Pêşmerge li Roma ye: Rola Îtalya ya li Kurdistanê tê xurtkirin

PeyamaKurd - Şandeke fermî ya Wezareta Pêşmerge, ji bo çend hevdîtinên leşkerî û ji nêzîk ve dîtina sîstema berevaniyê ya Îtalyayê, bi serdaneke fermî ya sê rojî gihîşt wî paytexta Îtalya Romayê.

Nûnera Hikûmeta Herêma Kurdistanê ya li Îtalyayê Rêzan Heme Salih, îro 4ê Hezîranê ragihand ku şanda Wezareta Pêşmerge li balafirxaneyê ji aliyê Cîgirê Generalê Operasyonên Hevpar ên Îtalyayê ve hatiye pêşwazîkirin.

Di roja yekem a serdanê de, civîneke berfireh ligel Kolonel Luciano Portolano (ku biryar e wek Serokê nû yê Erkanê Artêşa Îtalyayê dest bi kar bike) hat lidarxistin.

Di civînê de awayê karkirina Wezareta Berevaniyê ya Îtalyayê, hevahengiyên ligel NATOyê û birêvebirina operasyonan ji bo şandê hatin nirxandin.

Herwiha şandê serdana Odeya Operasyonên Hevpar a Îtalyayê kir û piştre bi helîkoptereke leşkerî ji bo serdana binkeyeke krîtîk ber bi herêma Florensê ve hat veguhestin.

Protokola sêalî û plana berfirehkirina hêzên Îtalyayê li Kurdistanê

Yek ji mijarên herî girîng ên danûstandinan, amadekariyên ji bo îmzekirina protokoleke leşkerî ya sêalî bû ku biryar e di navbera Wezareta Pêşmerge, Wezareta Berevaniyê ya Îtalyayê û Hikûmeta Federal a Iraqê de bê girêdan daku bigihîjin lihevkirineke hertimî ya ji bo hevkariya leşkerî ya li herêmê.

Rêzan Heme Salih eşkere kir ku aliyê Îtalî amadebûna xwe ya tam ji bo her piştgiriyeke leşkerî û perwerdehiyê bo hêzên Pêşmergeyan nîşan daye û tekez kiriye ku ew dixwazin wek hevparên sereke yên Hevpeymanan li Herêma Kurdistanê bimînin.

Rayedarên leşkerî yên Îtalyayê destnîşan kirin ku vekişandina beşek ji hêzên wan di dema borî de, tenê rêkareke demkî û taktîkî bû ji ber aloziyên leşkerî yên navbera Îsraîl, Amerîka û Îranê, lê niha plana wan heye ku bi awayekî berfirehtir vegerin û rola xwe ya li herêmê xurtir bikin.