Ma ( Platformê Ciwananê Xoseran ) Kam ê ?
Bi Nameyê Homayê Kurdistanî.
Her peynîye yew destpêk a. Belê, peynîya her çîyî destpêka çîyêko bîn xo reyde ana. Serranê 60-70'yan heta ewro, hereketê Kurdan yan zî êyê ke xo winî danê şinasnayîş, bakurê Kurdistanî de tim hewil dayê ke bi raya şerê çekdarî xo biresnê armancê xo. Labelê badê 55-60 serran gama ke ma ageyrenê û ewnîyenê rewşe ro ma vînenê ke averşîyayîşî rone hetêk ma xeylî meseleyan de apey şiyê.
Sernêkewtişê şerê çekdarî bi sebebê şikîyayîşê hêvî û xeyalanê Kurdan ê bakurê Kurdistan de. Bakurê welat de Kurdî, dayîşê hende bedelanê giranan ê ekonomîk, sosyolojîk û psîkolojîkan reyde çi heyf ke yew serkewtişo tewr qijek ra zî mehrûm mendê. Heta xeylî çîyanê destê xo de zî vindî kerdê. Ewro gama ke ma ewnîyenê rewşa sîyasî û komelkî ya bakurî ro ma şikîyayîş û yew bêhêvîtîya xeylî pîl vînenê. Şar êdî verê xo de seba rizgarbîyayîşo rewşa bindestîye ra alternatîvêk ciddî nêvîneno. Semedê ke alternatîvêk ciddî nêvînenê hêvî zî şikîyena û bi waştişê xo nêbo zî miletê ma hêdî hêdî entegrasyonî rê razî beno. Sebebê kêmbîyayîşo bilez o rêjeya qiseykerdişê Kurdî yo mîyanê şarî de zî na bêhêvîtî û qebûlkerdişê rewşa bindestîye û entegrasyonî yo.
Gelo şarê ma çira qebûlkerdişê rewşa entegrasyonî rê bêçare mend ? Çimkî çi hetêk sîyasî bi sebeb û metodanê ciddîyan nêvejîyeno verê înan û semedê rizgarîya neteweyî û niştimanî armanc û rêbazêko tatmînkar pêşkeşê înan nêkeno. Bileqs, êyê ke nameyê Kurdan ser o qisey kenê û qaşo sîyaset kenê, yan bi nameyê çepgirîye yan zî bi nameyê Îslamî bi şew û roj serdestanê Kurdan reyde semedê entegrekerdiş û helênayîşê Kurdan o mîyanê sîstemî de xebatêka bêhempa kenê. Semedê aye ra zî sey cewabê îhtîyacê miletê xo ma vejîyayê meydanî. Bi armancêko zelal û bi metodêko goreyê şert û îhtîyacanê miletê xo û goreyê rihê serdemî.
Ma hereketêko niştimanperwer o ciwanan ê. Ma dezgehêko ziwanî yan zî kulturî nîyê. Belê, helbet nê çîyî parçeyêk ê xebata ma ra. Heta ziwanê Kurdî bixo bingeyê na xebata ma yo. Xebata ma bingeyê ziwanê Kurdî ser o awan bîya û winî zî do berdewam bo. La manaya xo o nîyo ke ma teyna semedê xizmeta ziwanî vejîyayê meydanî. Xebata ma xebatêka rizgarîwaz a neteweyî û niştimanî ya miletê Kurd a û heme meseleyanê miletê Kurd zî xo ro gêna. Sey her hereketî prensîbê hereketê ma zî estê. Nê prensîban ra hîrê hebê bingeyînî nê yê; Tewhîd(Homaperestîye), Kurdistan(Niştimanperwerîye) û Merdimdostîye. Metodê ma yo mucadeleyî zî "Xoverdayîşo Pasîv" o, yanî rêbazê ma de bikarardişê şîddetî çino. La çîyanê ke serdestan welatê ma de ma ser o ferz kerdê ma do merhele bi merhele hemeyan red bikerê û cuya xo ra vejê.
Verê çendêk Dîyarbekir de, Meydanê Şêx Seîdî de ma bi werdişê "Sondê Cuya Bi Kurdî" çîka verên a nê meşê derg û pîrozî pana. Endamê ma yê ke nê sondî werdê êdî Kurdistan de çi rey bi ziwanê serdestan qisey nêkenê. Û na çalakîye do merhele bi merhele şaristananê cîyayan ê bakurê Kurdistanî de dewam bikera heta ke temamê miletê Kurd beşdarê nê sondî bibo û cuya xo de qiseykerdişê ziwanê serdestan ra fek verado. Êyê ku nê sondî wenê êdî welatê xo de her ca de, kuçeyan de, dezgehanê resmîyan de, çarşî û bazar de ûsn. tim bi Kurdî qisey kenê. No çî teyna parçeyêk o rêzileçalakîyanê ma ra ke ma do bikerê. Ney ra teber hema xeylî çalakîyê ma yê no tewir zî estê ke sibaroj de ma do înan yew bi yew bikerê.
Semedê ma, Kurdistan de xebata rizgarîwazîya neteweyî û niştimanî hem wacibêko dînî ya hem zî yew wezîfe û îhtîyacêko însanî û exlaqî ya.
Ewro dînê ma, destê serdestanê welatê ma de bîyo yew sîlah û seba wêrankerdişê welatê ma û îmhakerdişê miletê ma yeno şixulnayîş. Ma nê çîyî eşkere kenê ke qetîyen famkerdişê ma yo dînî û yê serdestanê ma yew nîyo. Homayê ke ê tarîf kenê seba pawitişê menfaetanê dewleta înan û meşrûkerdişê zilm û serwerîya înan teyna yew malzeme yo. La Homayê ke ma bawerîya xo pê anê, tim mezlûman û heq û edaletî reyde yo. Homa dişmenê Kurdan û Kurdistanî nîyo. Homa, Homayê Kurdistanî zî yo. Homa, Homayê Kurdistanî yo, Homayê miletê Kurd/mezlûm o.
Homayê Kurdistanî ma reyde yo heta ke ma dozê xo reyde bê...