Li Rojavayê Kurdistanê partîyek bi navê Partîşa Pêşeroja Sûrîyê (PPŞ) hat damezirandin. Her çiqasî nûnerên hinek kêmmilletan di kongreya wê de beşdar bûbin jî, lê piranîya nûneran dîsa Kurd bûn û xuyaye wek gelek partîyên ku serî Tirk, Ereb û Faris, lê wê bingeha wê dîsa Kurd bin û wê barê herî giran dîsa li ser milê Kurdên reben be.  

Gelo PKK û PYD bi serê xwe biryara damezirandina vê partîyê dane, yan bi zixt û daxwaza Amerîka û Fransayê ev partî hat damezirandin hê tam ne zelal be jî, lê dixuye ku proje projeya Amerîka û Fransayê ye. Gelo bi damezirandina vê partîya ku yekpare û yekrêzîya sînorên Sûrîyê di bernameya xwe de wek xetek sor kifş kiriye, çi tê xwestin û wê çi bê xwestin kêm zêde tê famkirin jî, dîsa jî ne tam zelal e. Lê di her halûkarê de ev partî jî wek partîya ku bi destûr û daxwaza dewleta Tirk ava bûye, ango wek HDP sînorparêz e û li dijî parçebûna Sûrîyê û damezirandina Kurdistanek serbixwe ye.

PPŞ a ku hestîyên pişta wê ji movikên YPG pêk tên, her çiqasî peyamên nerm û germ dan awira gelemperî jî, lê ji ber ku wê serê hefsêr dîsa di destê PYD û YPG de be, ji bo hevkarîya PYD û ENKS yan jî partîyên ku ne bi PYD re ne wê tu guhertinek berbiçav neyne. Her çiqasî serokê PPŞ yekî Ereb (Îbrahîm Qeftan) û sekretera wê yeke Kurd (Hevrîn Xelet) hatibin hilbijartin jî, ji beşdarên kongreyê dixuye ku giranî dîsa ji PYD pêk tê û heke PYD guh nede şîretên Amerîka û Fransayê, wê dîsa li dahola PKK de û siyaseta wê bimeşîne.

PKK di qada navnetewî de wek rêxistinek terorîst tê naskirin û qebûlkirin. Her çiqasî PYD parçeyek ji tevger û siyaseta PKK be jî, lê ji alî Amerîka û hêzên hevpeyman ve wek partîyek terorîst nehat qebûlkirin û herdu alî li hember ÎŞÎDê bûn hevkarên hev. Lê tevger û siyaseta PYD a ku di her wesîleyê de piştygirîya PKK û Ocalan dikir, darbe li hevkarîya wan û Amerîkayê dixist û rê ji êrîşên Tirkîyê re vedikir. Ev jî ji Amerîkayê re serêşandin û pirsgirêkek bi serê xwe bû.

Piştî ku Hêzên Sûrîyeya Demokratîk (yanî YPG) hêza xwe ji Rojhilatê Feratê kişand û şand hawara Efrînê, tifaqa di navbera Amerîka û YPG (PYD) de ket pêvajoyek nebaş û nîfaq ket navbera herdu alîyan. Ev yek jî bi kêrî dewleta Tirkîyê hat ku êrîşên li ser Efrînê zêdetir bike, Efrînê bistîne û doza Minbic û deverên din jî bike. Daxuyanîya Serokê Amerîkayê Donald Trump a ku got „emê di demek nêzîk de xwe ji Sûrîyê vekişînin“  dilê rayedarên Tirkîyê xweştir kir û Tirk ketin xewn û xeyalên ku Amerîka xwe ji Sûrîyê vekişîne û ew jî karibin bi hêsanî berê xwe bidin seranserê Rojavayê Kurdistanê û wek Efrînê dagîr bikin. Wek dibêjin, siyaset û polîtîka Rojhilata Navîn kêlî bi kêlî tê guhertin û gotinên ku îro hatine gotin, adinî rojê dibe tiştek din. Amerîka ya ku piştgirî da û dide Partîya Pêşeroja Sûrîyê (PPŞ) zêdekirina hêza xwe ya li Minbicê, eşkere kir ku gotinên Trump ne rast in û ewê ji Sûrîyê venekişin.

Serdana heyeta PYD a Fransayê û daxuyanîya Serokkomarê Fransayê Macron, darbeyek wek darbeya 15ê Tîrmehê li xewn û xeyalên rayedarên Tirkîyê xist. Tirkîyeya ku bi gotinên Trump dilxweş bûbû û li benda vekişîna Amerîkayê bû, bi gotinên Macron di xewn û xeyalên xwe de fetisî û dest bi êrîşkirina ser Macron kir. Macron piştgirî dabû Kurdên Rojava û gotibû ku ewê Kurdan bi tenê nehêlin û leşkirên xwe jî bişînin Rojavayê Kurdistanê.

Partîya Pêşeroja Sûrîyê (PPŞ) di bernameya xwe de eşkere dike ku ew jî wek HDP a Tirkîyê sînorparêzê xaka Sûrîyê ye û partîyek ji partîyên sîstema Sûrîyê ye. PPŞ, di bernameya xwe de her çiqasî demokrasî, mafê mirovan û pêkanîna reforman ji bo kêmmilletên Sûrîyê dixwaze jî, lê di paraztina sînorên Sûrîyê de wek rejîma Esed difikire. Her çiqasî di bernameya xwe de li dij şovenîzmê û cudaxwazîyê derdikeve jî, lê di rastîya xwe de bi paraztina sînorên Sûrîyê şovenîzmê û cudaxwazîya Erebî dike û sergirtî dijminatîya Kurd û Kurdistanê dike.

PPŞ, di xalek destûr û bernameya xwe de dibêje: “PPŞ, ji bo berjewendîya gelên Sûrîyê û paraztina yekîtîya xaka Sûrîyê hatiye avakirin. Divê yekîtîya Sûrîyê bê paraztin û temamê projeyên cudaxwazîyê bên redkirin“.

Di destûr, bername û daxwazên PPŞ de dixuye ku ev partî jî wek HDP ne partîyek Kurdî û Kurdistanî ye, partîyek rejîm û sîstema Sûrîyê ye û ji berjewendîyên Kurdan zêdetir xwedî li berjewendî û sînorên dagîrkerên Kurdistanê derdikeve.

Z.B

Ev nivîs 210814 car hatiye xwendin.