Hema bêjin piranîya pispor û nûçegihanên Rojhilata Navîn di wê bawerîyê de ne ku têkçûn û dagîrkirina Efrînê darbeyek mezin li xewna Kurdan xistiye, û têkçûna Efrînê wek “destpêka têkçûna xewna Kurdistana Rojava“ dinirxînin.

Rojnameya Fransî Le Fîgaro, di rûpelên xwe de behsa rewşa Kurdên Rojava û rewşa Efrînê kir û nivîsek bi navê “Ji bo Kurdistana Sûrîyê destpêka têkçûna dawî“ weşand.

Nivîsa ku ji alî Adrîen Jaulmes ve hatiye nivîsandin, destnîşan dike ku “ji bo YPG mengene teng dibe“ û dibêje: “Ji alî artêşa Tirkîyê ve dagîrkirina Efrînê, tê wateya têkçûna xewna Kurdistana Sûrîyê. Şert û şirûtên ku ji bo herêmek xweserîya Kurdan hebûn li ber têkçûnê ne“.

Jaulmes, di nivîsa xwe de tîne zimên ku ji bo dagîrkirina Efrînê Rûsyayê destek û piştgirî daye Tirkîyê û dibêje: “Rûsya ji bo ku planên Amerîkayê têk bibe, ketiye nav tevgerê. Herweha hikûmeta Sûrîyê jî ji bo ketin û derketina Efrînê rê neda û nehişt ku çek ji YPG re bên şandin. Ji ber vê yekê, hikûmeta Sûrîyê jî şirîk û gunehkar e“.

Jaulmes, tîne zimên ku hêzên Amerîka yên li Sûrîyê garantîya herî dawîn a Kurdan e û dibêje: “Lê belê polîtîka derve ya bêserûber di rewşekê de ye ku meriv nikaribe her tiştî bibîne“.

Ji alîyê din, di Le Fîgaro de behsa rewşa Menbicê jî hatiye kirin û tê gotin ku piştî Efrînê armanca Tirkîyê dagîrkirina Minbicê ye û dibêje: “Menbic ne Efrîn e. Li vajayî Efrînê, şênîyên Menbicê bi piranî Ereb in. Di desthilatdarîyê de pirsgirêkên Kurd û Ereban hene. Ji bilî ku bawerîya xwe bi 200 leşkirên Amerîkayê bînin, tu bijardeyên Kurdan tunene. Lê ji bo ku rewş xirabtir nebe û Amerîka bi Tirkîyê re li hev bê, dibe ku Kurd ji Menbicê jî bên derxistin. Ji bo ku Kurd heman senaryoyê nejîn, karin bi Şamê re bibin yek“.

Z.B