Her çiqasî rayedarên dewleta Tirk qebûl nakin û dibêjin ku ew ji bo kujtina sivîlan pir zîz û hesas in jî,  encamên êrîşên wan û vîdeoyên ku li Efrînê bombebarana Kurdên sivîl nîşan didin, gotinên rayedarên dewleta Tirk derew derdixin. Di bombebarandina herî dawîn de dîsa 20 Kurdên sivîl hatin qetilkirin ku di nav wan de zarok jî hebûn.

Awira gelemperî ya Amerîka û Ewrûpayê jî êdî ji kujtina Kurdên sivîl endîşe dikin û di nav gumanan de ne. Karbidest û rayedarên dezgehê Ewrûpayê êdî ji êrîşên ser Efrînê û kujtina Kurdên sivîl re dibêjin bes e û helwesta xwe datînin.

Berdevka Komîserîya Bilind a Mafê Mirovan (OHCHR) Ravîna Shamdasanî, di derbarê êrîşên dewleta Tirk û kujtina Kurdên sivîl de axivî û got: “Mirin û kujtinên sivîl yên ku di encama êrîşên hewayî û bejayî de pêk tên me dixe nav guman û endîşeyan. Di vê derbarê de nûçeyên xemgîn digihên destên me“.

Shamdasanî, ji rojnamevanan re anî zimên ku li Efrînê rewşa mirovî pir xirab bûye û nexweşxane ji brîndaran tên dagirtin û got: “Sivîlên Efrînê di vê xeterîyê de ne ku bên kujtin, brîndar bibin yan jî wek mertan bên bikaranîn. Divê herkes ji bo derketina sivîlên Efrînê erkên xwe bînin cîh, divê sivîlên ku dixwazin terka Efrînê bikin rê ji wan re bê vekirin û sivîlên ku dixwazin li Efrînê bimînin jî bên paraztin“.

Ji alîyê din, Fona Zarokan a Yekîtîya Milletan (UNICEF) jî daxuyand ku li Efrînê zarok tên kujtin û di şerê Efrînê de heta niha gelek zarok hatine kujtin û got: “Li Efrînê pirsgirêka avê dest pê kiriye. Ji ber vexwarina ava girikî û ne pakij 250 hezar kes karin nexweş bikevin“.

Z.B