Me berî niha jî nivîsandibû, aqûbeta ku hat serê Kerkûkê wê bê serê Efrînê jî. Ji ber ne Amerîka, ne Rûsya û ne jî dewletên din, naxwazin Kurd biserkevin û di herêmê de bibin xwedî erk, xwedî hêz û xwedî gotin. Her çiqasî Amerîka, Rûsya û dewletên hevpeyman Kurdan wek hevkarê xwe dibînin û bêyî Kurdan nikarin şerê rêxistinên wek ÎŞÎDê bikin jî, lê di mijara yekîtî û serxwebûna Kurdistanê de ne xwedî biryar in, naxwazin û hetta Kurdistanek serbixwe ji bo xwe xeter jî dibînin. Halîhazir rewş wisa dixuye. Lê di pêşerojê de wê çi bê guhertin, kes nizane.

Çawa ku Amerîka û dewletên hevpeyman li Kerkûkê bêdeng man û bûn şirîkê xiyanet û dagîrkirina Kerkûkê, xuyaye heman xiyanetê li Efrînê jî dikin. Hem Rûsya, hem Amerîka û dewletên hevpeyman wek Kerkûkê ji êrîşên ser Efrînê re jî bêdeng in, bi vê bêdengîyya xwe piştgirîyek mezin didin Tirkîyê û rûn li ser navê Rûsya, Îran, Sûrîye û Tirkîyê dikin. Bi vê yekê carek din xuya bû ku çi Amerîka û Rûsya be, çi jî dewletên rojava û dewletên dagîrker bin, naxwazin Kurd wek millet bibin yek û Kurdistan jî bibe dewletek serbixwe. Ew her dixwazin Kurd di nav sînorên dewletên dagîrker de kole û hêsîr bimînin, bi hinek mafên piçûk dengê wan bê birrîn da ku Kurd her û her muhtacî wan bin.

Di vê derbarê de Pispora Têkilîyên Navdewletî û Akademîsyen Dr. Arzu Yilmaz, aqûbeta Efrînê jî wek aqûbeta Kerkûkê dibîne û tîne zimên ku li Kerkûkê çi bûbe, Efrîn jî berdewamîya wê ye.

Arzu Yilmaz, di derbarê rewşa Efrînê û êrîşên ser Efrînê de axivî û dîtinên xwe anîn zimên. Yilmaz, anî zimên ku sersebebê pirsgirêkên navbera Kurdên Sûrîyê û rejîma Esed Rûsya bi xwe ye û got: “ Hêzên Kurd dixwestin bi rejîma Sûrîyê re têkilîyê deynin, lê Rûsya herdem dibû asteng. Sedema ku têkilîyên navbera YPG û Esed pêk nedihatin, Rûsya bi xwe bû, Rûsya ev yek nedixwest. Dixuye ku Rûsya bi vê yekê dixwaze Tirkîye û rejîma Esed bike mixatabên hev, wan li hev bîne û wan bîne ser heman maseyê“.

Yilmaz, di derbarê Efrînê û hatina milîsên Îranê de jî tine zimên ku ji ber Rûsyayê rejîma Sûrîyê nikarîbû artêşa xwe bişîne Efrînê, lê Îranê ev fersend bi kar anîye û bêyî ku hesabê Rûsyayê bike milîsên xwe şandiye Efrînê. Ev yek jî encam û fikara ku tevgera Kurd û Îranê li hev kiribe derdixe holê.

Arzu Yilmaz, di derbarê pêşeroja Kurdan de bi dudilî diaxive, di wê şik û gumamê de ye ku piştî şikestin û têkbirina ÎŞÎDê, wê hêzên mezin yên navdewletî dîsa pişta xwe bidin Kurdan, wan bi tenê bihêlin û ji niha ve di vê derbarê de hevkar û hevfikir in û dibêje: “Ez tiştên ku îro li Efrînê pêk tên û tiştên ku piştî referandûmê li Kerkûka Herêma Kurdistanê pêk hatin ji hev cuda nakim. Li Kerkûkê çi bûbe, tiştên li Efrînê dibin jî berdewamîya wê ye “.

Z.B

Ev nivîs 210806 car hatiye xwendin.