نرخی نەوت لە بازاڕەکانی جیهاندا
پەیامی کورد ... بە گوێرەی هەواڵی ئاژانسەكانی ئابووری لە جیهان بڵاویان كردەوە ئەمڕۆ یەکشەممە ٣٠ی ٠٨ی ٢٠٢٠ بە هۆی کەمبوونەوەی ئاستی بەرهەمهێنانی نەوت لە کەنداوی مەکسیک و بەردەوامی سیاسەتی کەمکردنەوەی نەوت لەلایەن ئۆپێکەوە، نرخی نەوتی خاو روی لە بەرزبوونەوە کرد.
بەپێی هەواڵێکی بلومبێرگ، ئەمڕۆ یەکشەممە نرخی نەوتی خاوی برێنت ٠.٢١ سەنت بەرزبوەوە، کە دەکاتە ٠.٤٦%ی نرخەکەی و لەدواین مامەڵەدا بە ٤٥.٨١ دۆلار فرۆشرا.
لەبەرامبەردا نرخی نەوتی خاوی تەکساسی ئەمریکی ٠.٠٧ سەنت دابەزی و لە دوایین مامەڵەدا بە ٤٢.٩٧ دۆلار بۆ هەر بەرمیلێک مامەڵەی پێوەکرا،بەوەش نرخەکەی بەڕێژەی ٠.١٦% کەمیکردوە.
لەماوەی رابردوودا، بەهۆی ئەو زریانەی کە گەیشتبوە ناوچەی کەنداوی مەکسیک، ٣١٠ دامەزراوەی بەرهەمهێنانی نەوتی ناوچەکە لەکارکەوتون، لەئەنجامدا قەبارەی بەرهەمهێنانی نەوت بەڕێژەی ٨٢% کەمیکردوە، بەوەش ئاستی خستنەڕووی بەرهەمەکە لە بازاڕەکاندا دابەزینی بەرچاوی بەخۆیەوە بینیوە.
هۆکارێکی دیکەی بەرزبوونەوەی نرخی نەوت، دەستپێکردنەوەی بەشێک لەچالاکییە بازرگانییەکانی ئەوروپا و ئەمریکایە، چینیش وەک سەرچاوەی نەخۆشییەکە هەڵسانەوە و دەستپێکردنەوەی رێژەیەکی زۆری چالاکییە ئابوورییەکانی راگەیاندوە.