یۆنامی داوای هێورکردنەوەی بارگرژییەکانی عێراق دەکات
پەیامی کورد... یۆنامی داوای هێورکردنەوەی بارگرژییەکانی عێراق دەکات
یۆنامی داوا لە لایەنە سیاسییەکانی عێراق دەکات کار لەسەر هێورکردنەوەی بارگرژییەکان بکەن.
نوێنەرایەتیی نەتەوە یەکگرتووەکان لە عێراق (یۆنامی) ڕاگەیەندراوێکی بڵاو کردەوە و تێیدا داوا لە سەرجەم خۆپیشاندەران دەکات دەستبەجێ ناوچەی سەوزی بەغدا جێ بهێڵن، سەرجەم بینا حکومییەکان چۆڵ بکەن و ڕێگە بدەن حکومەت بەردەوام بێت لە بەرپرسیارێتییەکانی بەڕێوەبردنی دەوڵەت لە خزمەت عێراقییەکاندا.
دەشڵێت، «پێشهاتەکانی ئەمڕۆ پەرەسەندنێکی زۆر مەترسیدارە. دەبێت دەزگاکانی دەوڵەت لە خزمەتی گەلی عێراقدا بن، لە هەموو بارودۆخێک و لە هەموو کاتێکدا».
یۆنامی داواش لە هەمووان دەکات بە ئاشتی بمێننەوە و لەگەڵ هێزە ئەمنییەکان هاوکاری بکەن، خۆیان لەو کردەوانە بەدووربگرن کە دەبنە هۆی زنجیرەیەک ڕووداوی کۆنترۆڵ نەکراو.
داواش لە لایەنە سیاسییەکان دەکات کاربکەن بۆ کەمکردنەوەی گرژییەکان و پەنا بۆ دیالۆگ ببەن وەک تاکە ئامرازێک بۆ چارەسەرکردنی ناکۆکییەکان. دووپاتیشی دەکاتەوە، «ناکرێت عێراقییەکان بە بارمتە بگیرێن بۆ دۆخێکی پێشبینینەکراو و ناجێگیر».
پەیامەکە لە کاتێکدایە ئەمڕۆ خۆپیشاندەرانی لایەنگری ڕەوتی سەدر چوونە ناو بینا حکومییەکان لە بەغدا و هەندێک پارێزگای دیکە، دوای ئەوەی ئایەتوڵڵا کازم حائیری مەرجەعی ئاینیی سەدرییەکان وازهێنانی لە مەرجەعیت و، موقتەدا سەدر سەرۆکی ڕەوتی سەدر وازهێنانی لە کاری سیاسی ڕاگەیاند.