ڤاتیکان ناوەڕۆکی دانیشتنەکەی پاپا و سیستانی بڵاو کردەوە

پەیامی کورد … ڤاتیکان ناوەڕۆکی دانیشتنەکەی پاپا و سیستانی بڵاو کردەوە

حکوومەتی ڤاتیکان بەیاننامەیەک لەبارەی کۆبوونەوەی پاپای وڵاتەکەی و مەرجەعی باڵای شیعەکانی عێراق، بڵاو دەکاتەوە.

سەرلەبەیانیی ئەمڕۆ شەممە ٦ی ئاداری ٢٠٢١،، پاپا فرانسیس، پاپای ڤاتیکان سەردانی نەجەفی کرد و لەگەڵ ئایەتوڵڵا عەلی سیستانی، مەرجەعی باڵای شیعەکانی عێراق کۆ بووەوە.

لە بەیاننامەیەکدا، حکوومەتی ڤاتیکان رایگەیاندووە، کۆبوونەوەکەی پاپا فرانسیس و ئایەتوڵڵا عەلی سیستانی ٤٥ خولەکی خایاندووە و تێیدا پاپا جەختی لە گرنگیی هاوکاری و دۆستایەتیی ئایینەکان کردووەتەوە.

پاپا فرانسیس هەر لە کۆبوونەوەکەدا، باسی گرنگیی رێزگرتنی هاوبەش و دانوستاندنەکانی بۆ هێنانەدیی ئاشتی و خێر بۆ گەلانی عێراق و مرۆڤایەتی بە گشتی، کردووە.

هەروەک لە بەیاننامەکەدا هاتووە، پاپا فرانسیس سوپاسی مەرجەعی باڵای شیعەکانی عێراقی لە رووبەڕووبوونەوەی توندوتیژی کردووە و رایگەیاندووە، ”ژیانی مرۆڤایەتی پیرۆزە“.