زانیاری نوێی پێنتاگۆن لە سەر هێرشە مووشەکییەکانی ئێران بۆ سەر بنکەکانی ئەمریکا لە عێراق
پەیامی کورد ... وەزیری بەرگری ئەمریکا رایگەیاند، تاران ١٦ مووشەکی بالیستیکی ئاڕاستەی بنکە سەربازییەکانی ئەمریکا لە عێراق کردوە و مووشەکەکانیش لە سێ قۆڵەوە ئاراستەکراون، دەشڵێت، "لەو ژمارەیە ١٢ موشەکیان گەشتونەتە ئامانجەکانیان".
مارک ئیسپەر وەزیری بەرگری ئەمریکا لە لێدوانێکی رۆژنامەنوسیدا ئاماژەی بەوەشکردوە، "١١ مووشەک ئاڕاستەی بنکەی سەربازی عەین ئەلئەسەد کراوە و مووشەکێکیش بنکەیەکی هێزەکانی هاوپەیمانی نێودەوڵەتی لە هەولێر کردوەتە ئامانج".
رونیشکردوەتەوە، بەهۆی هێرشەکە زیان بە ناوچەکانی نزیک لە بنکە سەربازییەکان کەوتوە و تائێستاش هێزەکانی ئەمریکا لەناوچەکدا لە حاڵەتی ئامادەباشیدایە.
ئەوە لە کاتێکدایە دوێنێش ئێران لە رێگەی ژمارەیەک مووشەکەوە بنکەی عەین ئەلئەسدی تایبەت بە ئەمریکییەکانی لە پارێزگای ئەنبار و بنکەی هێزەکانی ئەمریکای لە هەریر بۆردوومانکرد کە نزکترین بنکەی ئەمریکییە لە سنوری ئێران و دەکەوێتە سنوری پارێزگای هەولێر، بە گوێرەی فەرماندەکانی ئەمریکاش بۆردومانەکە زیانی نەبوە و هێزەکانیان سەلامەتن.