زیاتر لە 30 ئەندامی کۆنگرێس هۆشداری دەدەنە بایدن لە گەڕانەوەی بۆ ڕێککەوتنی ئەتۆمی
پەیامی کورد… زیاتر لە 30 ئەندامی کۆنگرێس هۆشداری دەدەنە بایدن لە گەڕانەوەی بۆ ڕێککەوتنی ئەتۆمی
لە نامەکەدا ئەو ئەندامانەی ئەنجوومەنی پیران ڕوونیانکردووەتەوە، بایدن بەپێی یاسا پابەندکراوە بەوەی ڕۆڵ بدات بە ئەنجومەنی پیران بۆ دەستوەردان لەو پرسەدا و دەڵێن، «ئێمە پابەندین بە بەکارهێنانی سەرجەم بژاردەکان بۆ بەخشینی ئەو ڕۆڵە بە ئەنجومەنەکە، ڕێگری لە جێبەجێکردنی هەر ڕێککەتنێکیش دەکەین ئەگەر تێیدا ئەندامانی کۆنگرێس دووربخرێنەوە».
کۆمارییەکانی پیران دەڵێن، «دەمانەوێت جەخت لە تێڕوانینەکانمان بکەینەوە کە هەر ڕێککەوتنێک لەگەڵ ئێران سەبارەت بە بەرنامە ئەتۆمییەکەی، دەبێتە مەترسی بۆسەر ئاسایشی نیشتمانیی ئەمریکا، بۆیە داوادەکەین بۆ هەر بڕیارێک ڕاوێژ و ڕەزامەندیی ئەنجومەنی پیران وەربگیرێت».
ڕەخنەشیان لە هەنگاوەکانی بایدن لەوبارەیەوە گرتووە و دەڵێن، «لە ماوەی ساڵی یەکەمی ئیدارەکەتدا، ئێران پێشکەوتنی زۆری بەخۆوەبینیوە لەڕووی بەرنامە ئەتۆمییەکەیەوە، لەوانە، پیتاندنی یۆرانیۆم بەڕێژەی 60%، فراوانکردنی بڕی یۆرانیۆمی گەنجینەکراوی بەبڕی سێ هەزار و 200 کیلۆگرام، بەرهەمهێنانی بڕی 200 گرام لە یۆرانیۆمی پیتێنراو کە دەکرێت ئەمە لە دروستکردنی چەکی ئەتۆمیدا بەکاربهێنێت».
لە دەقی یاسای پێداچوونەوەی ڕێککەوتنی ئەتۆمیی ساڵی 2015دا بەناوی» INARA» دا هاتووە، لەسەر سەرۆک پێویستە «دەقی ڕێککەوتنەکە و سەرجەم بەند و ماددەکانی» ڕەوانەی کۆنگرێس بکات لەماوە پێنج ڕۆژ دوای گەیشتن بە ڕێککەوتن، بۆ پەسەندکردنی ڕێککەوتنەکەش پێویستە لانیکەم 60 دەنگی ئەندامانی ئەنجومەنی پیران بەدەستبهێنێت و دەنگبەدەن بە مانەوە لە ڕێککەوتنەکەدا.
کۆمارییەکان ئێستا لە ئەنجومەنی پیران زۆرینەن و 50 ئەندامیان هەیە، لەکاتێکدا دیموکراتەکان 48 ئەندامیان هەیە، هەرچەندە سەرۆک و جێگری ئەنجومەنەکە مەیلیان بەلای دیموکراتەکانە.