مارك ڕووتە : ئێران بە نزیک بوونەوە لە هەڕەشەی ئەتۆمی، بشێوی و تیرۆریزم هەناردە دەکات
PeyamaKurd - مارك ڕووتە : ئێران بە نزیک بوونەوە لە هەڕەشەی ئەتۆمی، بشێوی و تیرۆریزم هەناردە دەکات
مارک ڕووتە سکرتێری گشتی هاوپەیمانی ناتۆ سپاسی هەوڵەکانی ئەمریکای بۆ پێشگرتن بە تەماحە ئەتۆمییەکانی ئێران کرد و هۆشداری دا کە تاران لە هەناردەکردنی بشێوی و تێرۆریزم کە ئەمنییەتی جیهانی خستووەتە مەترسییەوە، بەردەوامە.
ڕووتە دوای دیدارەکەی لەگەڵ دۆناڵد ترامپ سەرۆککۆماری ئەمریکا لە کۆشکی سپی بە ڕۆژنامەنووسانی ڕاگەیاند کە ئێران لە بنەڕەت دا بە توانای ئەتۆمی گەیشتبوو و ئەمەش دەبووە هەڕەشەیەکی گەورە بۆ سەر ناوچەکە و تەواوی جیهان.
ناوبراو ئاماژەی بەوە کرد کە لە کۆبوونەوەی گرووپی حەوت دا سەرجەم ڕابەران پێشوازییان لە لاوازکردنی ئەم توانا ئەتۆمییەی ئێران کردووە.
سکرتێری گشتی ناتۆ جەختی کردەوە کە دۆناڵد ترامپ وەک ڕابەری جیهانی ئازاد بەرپرسیارییەتی پاراستنی ئەمنییەتی لە دەرەوەی سنوورەکانی ئەمریکا گرتووەتە ئەستۆ.