عێراق دەروازەی سنووری سەیرانبەی بە فەرمی ناساند
پەیامی کورد ... عێراق دەروازەی سنووری سەیرانبەی بە فەرمی ناساند
پارێزگاری پارێزگای سنەی ڕۆژهەڵاتی کوردستان رایگەیاند، حکوومەتی عێراق دەروازەی سەیران بەن-ی لەنێوان قەزای پێنجوێن و شاری بانەی بەفەرمی ناساند و ئەوەش کاریگەرییەکی بەرچاوی دەبێت لەسەر گەشەپێدانی جوڵەی بازرگانی لەنێوان ئێران و هەرێمی کوردستاندا.
بەهمەن مورادینا، پارێزگاری پارێزگای سنە لەکۆبوونەوەیەدا لەگەڵ ئەنجومەنی پلاندانانی پارێزگاکەیدا ئاماژەی بەوەشکرد، " حکومەتی عێراق دەروازەی سەیران بەن-ی بەفەرمی ناساند، ئەوە هەنگاوە بۆ ئێمە زۆر گرنگە کەکاریگەری بەرچاوی لەسەر جوڵەی بازرگانی پارێزگاکەمان بەگشتی و شاری بانە بەتایبەتی دەبێت".
ئاماژەی بەوەشکرد، لەهەفتەی داهاتووەوە هەردو دەروازەی "مله خورد سەوڵاوا" و"خانم شيخان"ـیش لە شاری مەریوان دەکرێنەوە، کردنەوەی ئەو دەروازانەش هاوکار دەبێت بۆ ئەوەی خەڵكی بانە و مەریوان کەرەستە خۆماڵییەکان و پێداوسییەکانی ناو ماڵ هەناردەی عێراق بکەن و لەورێگەیەوەش داهاتێک بۆ خۆیان دەسبەردەکەن.
سەیران بەن، یەكێكە دەروازە نیمچە فەرمییەكانی سنوری شارۆكەی پێنجوێنی سەر بە پارێزگای سلێمانی، دەروازەکە نزیكە ٤٠ كیلۆمەتر لە پێنجوێنەوە دوورە و هەرێمی كوردستان بە شاری بانەی رۆژهەڵاتی كوردستان دەبەستێتەوە، ڕۆژانە كەلوپەلی خۆراك و بیناسازی و كارەبایی و خواردەمەنی لێ هاوردە و هەناردە دەكرێت.