بەم هۆکارە ، بڕیاری ناردنە دەرەوەی بەركەوتووانی چەکی کیمیاوی ڕاگیرا !!!
پەیامی کورد ... بڕیاری ناردنە دەرەوەی بەركەوتووانی چەکی کیمیاوی ڕاگیرا.
د. ئازاد مستەفا، بەڕێوبەری گشتی تەندرووستی پارێزگای هەڵەبجە، ڕایگەیاند: "بڕیار بوو لە چەند ڕۆژی ڕابردوودا ٥٣ بەركەوتووی چەكی كیمیایی بۆ چارەسەر بنێرینە دەرەوەی ووڵات، بەڵام بە هۆی تەشەنەكردنی ڤیرووسی کرۆنا لە ووڵاتان و مەترسی نەخۆشییەكە، بڕیار درا پڕۆسەكە ڕابگیردرێت".
مستەفا زیاتر دەڵێ: "بەركەوتووانی چەكی كیمیایی باری تەندرووستییان جێگیر نییە و نابێت هیچ مەترسییەكی تری تەندرووستی لەسەریان درووست ببێت، بۆیە ئێمەش وەك وەزارەت و بەڕێوبەرایەتی گشتی تەندرووستی هەڵەبجە، بڕیارمان دا بۆ پاراستنی بەركەوتووانی چەكی كیمیایی، بۆ ماوەیەك ناردنە دەرەوەی بەركەوتووان بۆ چارەسەر دوابخەین".
بەڕێوبەری گشتی تەندرووستی پارێزگای هەڵەبجە ئاماژەشی دا: "تەواوی ئامادەكارییەكان بۆ ناردنەدەرەوەی بەركەوتووان بەكۆتا گەیشتوون و حكوومەت زیاتر لە ١٠٠ ملیۆن دیناری بۆ ٥٣ بەركەوتووەكەی چەكی كیمیایی تەرخان كردووە، ئەگەربێت و تا ڕۆژی هەینی ئایندە دۆخی جیهان لەبارەی ڤیرووسی كرۆناوە سەقامگیری بەخۆیەوە ببینێت، بڕیار هەیە بەركەوتووانی چەكی كیمیایی ڕەوانەی دەرەوە بكرێن بۆ وەرگرتنی چارەسەرەكەیان".