بەرەبەیانی ئەمڕۆ بەندکراوێکی دیکەی سیاسی کورد لە ئۆرمیە لە سێدارەدرا

بەرەبەیانی ئەمڕۆ دەزگای دادوەری ئێران لە گرتووخانەی شاری "میاندواو"ی سەر بە پارێزگای ئورمیە، کەمال ئەحمەدنەژاد، بەندکراوی سیاسی کوردی دوای چوار ساڵ بەندکران، لەسێدارە دا.

بەپێی هەواڵ و زانیارییەکان بەرەبەیانی ئەمڕۆ دووشەممە " ١٠ی سێپتەمبەری ٢٠١٨ " ، دەزگای دادوەری ئێران کەماڵ ئەحمەدنەژاد، بەندکراوی سیاسی کورد لە گرتووخانەی شاری میاندواو بە تۆمەتی "ئەندام بوون لە حزبی دیموکراتی کوردستان" لەسێدارە داوە.

بەپێی ئەو زانیارییە ، جێبەجێکردنی حوکمی سێدارەی ئەو بەندکراوە سیاسییەی کورد بەبێ ئاگاداری بنەماڵە و کەسوکارەکەی بووە.

کەماڵ ئەحمەدنەژاد، خەڵکی گوندی "گامێشگۆلی"ی میاندواو بووە کە پاییزی ساڵی ٢٠١٤ هاوڕێ لەگەڵ پێنج کەسی دیکە بەناوەکانی "میلاد عەبدی، سەعید سیاهی، سەلێمان کری، مستەفا تاهیرزادە و هەڵمت عەبدوڵاهی" بە تۆمەتی کوشتنی ئەندامێکی سوپای پاسداران بەناوی "هاشم زەینەلی" دەستگیر کراون.

هاوینی ساڵی ٢٠١٥ لەلایەن دەزگای دادوەریی ئێرانەوە حوکمی سێدارە بۆ کەماڵ ئەحمەدنەژاد بڕایەوە و پێنج کەسەکەی دیکەش هەرکام بە 15 ساڵ بەندکران حوکم دراون.