کۆبوونەوەکان لەگەڵ بەغدا بۆ ئاساییکردنەوەی دۆخی کەرکووک تا دێت چڕتر دەبێت

پەیامی کورد       ...   کۆبوونەوەکان لەگەڵ بەغدا بۆ ئاساییکردنەوەی دۆخی کەرکووک تا دێت چڕتر دەبێت

 ئەندامێکی لیژنەی ئاساییکردنەوەی دۆخی کەرکووک ڕایگەیاند ، دۆخی کەرکووک زۆر خراپە و ھەموو لایەک، بەتایبەت حکوومەتی عێراق و نەتەوە یەکگرتووەکان ھەستیان بەو مەترسییە کردووە کە دۆخی ئەمنی ناوچەکە خراپە، بۆیە کۆبوونەوەکان چڕ کراونەتەوە بۆ ئەوەی بگەینە ڕێککەوتن و ھەوڵیش دەدرێت پێش ھەڵبژاردن دۆخی ئەو ناوچانە ئاسایی بکرێتەوە.

شاخەوان عەبدۆلڵا، ئەندامی لیژنەی ئاساییکردنەوەی دۆخی کەرکووک، ڕایگەیاند : "دانووستانەکانی ئێمە لەگەڵ بەغدا بۆ ئاساییکردنەوەی دۆخی کەرکووک بەردەوامە و بەردەوام کۆبوونەوە دەکەین و ھەنگاوی باشیشمان بڕیوە و ھەوڵ دەدەین پێش ئەوەی  ھەڵبژاردن بکرێت، دۆخی ئەو ناوچانە ئاسایی بکرێتەوە."

شاخەوان عەبدۆلڵا ووتیشی: "بەھۆی خراپیی دۆخی ئەو ناوچانە، کۆبوونەوەکان چڕ کراونەتەوە و لەلای حکوومەتی عێراق و نەتەوە یەکگرتووەکانیش باسی خراپیی دۆخی کەرکووک ھەیە، بۆیە ھەمووان ھەستیان پێ کردووە، چوونکە مەترسی و جمووجۆڵی داعش زۆر زیادی کردووە لە سنووری کەرکووک، ھەر بۆیە کۆبوونەوەکان چڕ کراونەتەوە و بەردەوامن بۆ ئەوەی بتوانین بگەینە ڕێککەوتن و تا کاتی ھەڵبژاردنەکان دۆخی ئەو ناوچانە ئاسایی بکرێتەوە."