داتای چارەکی سێیەمی فرۆشتنی نەوتی هەرێم بۆ ساڵی ڕابردوو بڵاو كرایەوە
پەیامی کورد... داتای چارەکی سێیەمی فرۆشتنی نەوتی هەرێم بۆ ساڵی ڕابردوو بڵاو كرایەوە
فەرمانگەی میدیاو زانیاری هەرێم ڕایدەگەیەنێت لە مانگەکانی تەمووز و ئاب و ئەیلولی ساڵی ڕابردوو بڕی ۳٨ ملیۆن و ۷۳۰ هەزار بەرمیل نەوت فرۆشراوە و لەو بڕە ۳٥ ملیۆن و ۹۷۷ هەزار بەرمیلی لەڕێگای هەناردە کردن بۆ بەندەری جەیهانی تورکیا فرۆشتوە.
فەرمانگەی میدیاو زانیاری هەرێم ڕایگەیاند: فرۆشتنی نەوتی هەرێم بۆ چارەکی سێیەمی ساڵی ڕابردوو بەم شێوەیەبوە: لە مانگەکانی تەمووز و ئاب و ئەیلولی ساڵی ڕابردوو بڕی ۳٨ ملیۆن و ۷۳۰ هەزار بەرمیل نەوت فرۆشراوە و لەو بڕە ۳٥ ملیۆن و ۹۷۷ هەزار بەرمیلی لەڕێگای هەناردە کردن بۆ بەندەری جەیهانی تورکیا فرۆشراوە و ۲ ملیۆن و ۳۱۹ هەزار بەرمیل تەرخانکراوە بۆ پاڵاوگەکانی ناوخۆ و ٤۳۳ هەزار بەرمیلیش لە ناوخۆی هەرێم فرۆشراوە.
داتاکانی حکومەت دەری دەخات: بەرهەمی ڕۆژانەی نەوتی هەرێم لەو سێ مانگەدا ٤۲۱ هەزار بەرمیل بووە لە ڕۆژێکدا.
لە داتاكەدا هاتووە:بڕی ۲ ملیۆن و ۳۱۹ هەزار بەرمیل دراوەتە پاڵاوگەکانی ناوخۆ،كەچی ئاماژە بەداهاتەکەی نەکراوە و حکومەتی هەرێم ئاماژەی بەفرۆشتنی نەداوە بەڵکو بەپێی داتاکان تەرخانی کردووە بۆ پاڵاوگەکان و هیچ داهاتێکی وەرنەگرتووە .
ئەوەش خراوەتەڕوو: داهاتی نەوتی فرۆشراوی ناوخۆ و هەناردەکراو لەو سێ مانگەدا ۳ ملیار و ۱۱۷ ملیۆن دۆلار بووە، لەو بڕە یەک ملیار و ٥۱٤ ملیۆن دۆلاری وەکو کرێی بۆڕی و شایستەی کۆمپانیاکانی نەوت و خەرجی بووە، بڕی یەک ملیار و ٦۰۳ ملیۆن دۆلار بۆ وەزارەتی دارایی گەڕاوەتەوە کە بۆ هەرمانگێک پتر لە ٥٣٤ ملیۆن دۆلار بووە کە دەکاتە نزیکەی ٨۰۰ ملیار دیناری عێراقی.